Egnatia fitoi sot 1-0 në nisjen e rrugëtimit të saj në UEFA Champions League. Kampionët e Shqipërisë u përballën në “Egnatia Arena” me islandezët e Breidablik.
Në minutën e 18-të, rrogozhinasit një shans shumë të mirë për të gjetur golin, por pa sukses. Fillimisht Regi Lushkja dhe më pas Kastriot Selmani nuk u treguan të saktë. Pjesa e parë, edhe pse u dominua nga të besuarit e Edlir Tetovës, u mbyll në barazim pa gola.
Fillimi i pjesës së dytë foli sërish për rrogozhinasit, të cilët shpërdoruan disa raste me Bakayoko, duke mos arritur dot t’i konkretizonin me gol. Në minutën e 74-t, Poçi iu afrua shumë golit, por goditja e tij e fortë u ndal nga traversa.
Mundi i rrogozhinasve do të shpërblehej në minutat shtesë, ku gjetën golin me blerjen e re, Ildi Gruda. Shkodrani dërgoi topin në rrjetë, duke ngritur “peshë” gjithë stadiumin. Egnatia fiton 1-0 dhe shkon me avantazhin e një goli në ndeshjen e kthimit, pas një jave në Islandë.
Drita, kampione e Kosovës, ka fituar me rezultatin 1-0 ndaj Differdange, ekipit nga Luksemburgu, në duelin e parë të vlefshëm për eliminatoret e Champions League. Goli i sulmuesit Arb Manaj, në minutën e 73, vendosi këtë përballje, shkruan A2.
Drita dominoi nga fillimi në fund takimin, duke regjistruar plot 7 gjuajtje në kuadrat kundrejt 1 të skuadrës mike. Ndeshja e kthimit do të luhet pas 1 jave, në Luksemburg, aty ku kampionët e Kosovës shkojnë me avantazh. m.p.
