Aulon Kalaja, kandidati i Partisë Demokratike në Qarkun e Durrësit, në një lidhje direkte me studion e “Ditarit” theksoi se do të shkojë në SPAK për të kërkuar të drejtën e tij dhe për të mësuar se sa vota mori realisht në zgjedhjet e 11 majit.
“Disa na kanë akuzuar neve që kemi kërkuar rinumërimin se po legjitimonim Edi Ramën në farsën zgjedhore; ata të Ramës na thanë që neve po shtyjmë tabelën përfundimtare… Por, neve i kemi bërë një të mirë vendit me rinumërimin sepse ky rinumërim ndërroi një mandat në Fier”, tha Kalaja.
“KAS-i nuk mund të përcaktojë se ku kemi të bëjmë me gabime njerëzore dhe ku me krim zgjedhor. Unë kam marrë përsipër që të shkoj në SPAK dhe të bëj dy kallëzime penale sepse nuk kam rrugë tjetër. Kallëzimi i parë do të jetë për hapjen e kutive. Nga rinumërimi kemi diskordancë dhe do i kërkoj që të sqarojë nëse ishte gabim njerëzor apo krim zgjedhor. Po ashtu, do i referoj SPAK-ut çështjen e KAS-it, që ka shpërdoruar detyrën se nuk hapi kutitë e tjera. Kur po shikoj që e vërteta ime nuk do të dalë në dritë nga KAS-i, nuk kam rrugë tjetër. Unë nuk e di ende se sa vota kam. Si mundet që disa njerëz të ngrihen e të thonë që unë nuk do e marr vesh se sa vota kam realisht? Unë do të ezauroj të gjitha rrugët. Do të shkoj në SPAK për të kërkuar të drejtën time. U vërtetua që ka numërues që kanë futur duart në votat e qytetarëve. U vërtetua që mua më janë vjedhur vota, ndërsa ka pasur kandidatë që janë rritur artificialisht me vota, si nga PS dhe si nga PD. Hajduti mbetet hajdut, si i kuq, si blu…”, shtoi Aulon Kalaja. m.p.
