Këtë të premte po zhvillohen homazhe në nderim të kapitenit Arben Anamali i cili humbi jetën në ujërat e Liqenit të Shkodrës teksa po shpëtonte dy turistë.
Institucionet vendore shprehen ngushëllime familjarëve teksa vunë theksin tek akti heroik që Arbeni kreu për të shpëtuar jetën e të tjerëve.
“Në një ditë të vështirë si kjo e sotmja jemi në emër të Bashkisë për t’i shprehur ngushëllimet familjes Anamali për humbjen e birit të tyre i cili dha jetën në mënyrë heroike për të shpëtuar 2 turistë në Liqenin e Shkodrës.Arbeni do mbetet i paharruar për ne, jo vetëm për aktin heroik por edhe për njeriun që ishte.Ai i shpall hero i kombit ndaj edhe nderimi për të do të jetë brez pas brezi.Ngushëllime familjes”. u shpreh zv. kryetarja e Bashkisë Shkodër.
Mes lotësh bashkëshortja e të ndjerit dhe nipi i tij tregojnë për momentet kur mësuan lajmin e rëndë.
“Është një dhimbje e madhe për të gjithë familjen tonë për nanën, mua për fëmijët. Për të gjithë që e kanë njohur sepse ka qenë njëri shumë i mirë dhe i përkushtuar. Dha jetën e vet për turistët. Një kolege e tij me mori në telefon e më tha që po nisi dikë të marrë sepse Arbeni ka pësuar një aksident në liqen e mendova që aksident të lehtë por nuk e mendova kurrë që është mbyt sepse ka qenë shumë i fortë fizikisht, notar i mirë”, tha bashkëshortja e të ndjerit, Najada Anamali.
Arben Anamali ishte kapiten në anijen e cila shërbente për shëtitjen e turistëve në Liqenin e Shkodrës. Ai hyri në liqen për të shpëtuar 2 turistë që po mbyteshin por fatkeqësisht nuk mundi të dilte i gjallë. Pas 48 orësh kërkime ai u gjet nga polumbarët. Mes nderimesh dëshmori i atdheut Arben Anamali u përcoll për në banesën e fundit./kb
