Tensionet në zonën e Thethit janë përshkallëzuar ndjeshëm, ndërsa Inspektorati Kombëtar i Mbrojtjes së Territorit (IKMT) po vijon aksionin për shembjen e ndërtimeve pa leje në zonën e mbrojtur.
Burime për gazetarin Igli Çelmetën raportojnë se ditën e sotme disa persona ende të paidentifikuar kanë qëlluar me kokteje molotov ndaj mjeteve të IKMT-së, si edhe mbi urën kryesore të lagjes “Gjelaj”.
Pas incidentit, forcat e rendit rrethuan menjëherë zonën dhe kanë nisur operacionin për identifikimin dhe kapjen e autorëve të dyshuar. Në përgjigje të situatës së tensionuar, forcat speciale FNSH janë nisur nga Tirana për të mbështetur autoritetet lokale dhe për të garantuar sigurinë publike.
Ngjarja vjen në një klimë të acaruar, pas kritikave të forta të Ministrit të Drejtësisë, Ulsi Manja, ndaj Prokurorisë së Shkodrës për mosveprimin lidhur me hetimin e ndërtimeve në këtë zonë të mbrojtur. Autoritetet paralajmërojnë se operacioni do të vijojë pavarësisht rezistencës dhe tensioneve në terren./e.t
