Flutura Açka, deri vonë deputete e PD, ka bërë një rrëfim për Euronews. Ajo është një grua që e filloi karrierën larg pasionit të saj për letërsinë.
Ajo tregon sesi në komunizëm i imponuan studimet dhe punën larg pasionit të saj për letërsinë, ku përfundoi e emëruar si ekonomiste në thertore.
“Ne vitin 1988 u emërova ekonomiste e thertores. Isha në mes të një kasaphane ku derrave u gjuhej me çekan, ku lopëve u futeshin thika të gjata, ku pulat therreshin dhe futeshin në valë. Në njëfarë mënyre, diktatura u perceptua ashtu në ato vite në atë thertore”.
“Më vonë, ky perceptim më ndihmoi të formuloja dhe të ngrija plotësisht romanin ‘Ku je?’, që flet për atë që kam parë unë në vitet ‘80 gjatë fëmijërisë dhe rinisë sime. Kur më emëruan në thertore, unë nuk dija asgjë. Isha një vajzë me shumë ëndrra, lexoja dhe përktheja klasiket italiane. Ishte një kohë përzierjesh të mëdha, ëndërroja të bëhesha gazetare dhe redaktore, e përfundova ekonomiste në thertore. Unë zgjodha të studioja për letërsi, por partia nuk e pranoi dhe më dërgoi në ekonomik. Por unë doja të studioja, po nuk doja atë që kërkonte partia”, tregon ajo. m.p.
