Kryetari i lëvizjes “Shqipëria Bëhet”, Adriatik Lapaj, ka komentuar sërish zhvillimet e fundit brenda koalicionit me të cilin ai mori pjesë në zgjedhjet e 11 Majit dhe “prerjen të besë” të ish-aleatit të tij të “Nismës Thurrje”, Endrit Shaban.
I ftuar së fundmi në A2 CNN, Lapaj është shprehur sërish i zhgënjyer, duke pohuar se ndonëse miq të shumtë i kishin kërkuar që të mos i besonte Shabanit, ai vendosi që të “shtrëngonte duart” me shokun e tij prej 12-vitesh.
“Nuk e mendoja kurrë që dikush mund t’i bënte një akt kamikaz rrugëtimit politik të ndryshimit në Shqipëri”, tha më tej Lapaj, duke theksuar se nuk e kishte imagjinuar asnjëherë një ndarje në këtë formë.
Ndërkohë, sa i takon deklaratës së tij të mëparshme se nuk do të hynte në Parlament nëse subjekti politik që ai drejtonte do të merrte vetëm një mandat, Lapaj theksoi se ishte bërë në funksion të motivimit të ekipit, para formimit të koalicionit dhe se nuk kishte synuar keqinterpretim të sistemit zgjedhor.
Kujtojmë se më 23 korrik, kreu i KQZ-së Ilirjan Celibashi, i dha drejtim sherrit të ditëve të fundit mes dy ish-aleatëve, Adriatik Lapajt dhe Endri Shabanit për “karrigen” në Parlament.
Përfundimisht, sipas kreut të KQZ, Lapaj mbeti zyrtarisht jashtë Kuvendit të Shqipërisë, ndërkohë që mandati i deputetit të Nisma Shqipëria Bëhet i kaloi Kleana Xhuvelit, kushërirës së Lapajt.
Në një deklaratë të shkurtër për mediat, kjo e fundit u shpreh se do të mbajë mandatin e saj deri në momentin që ai t’i rikthehet të zotit, pra Lapajt.
“Deri në ditët qe beteja ligjore do ta kthejë te i Zoti, te njeriu më i besuar i tij Adriatik Lapaj. Unë jam 27 vjeçe dhe jam kushërira e Adriatik Lapajt”, tha ajo shkurtimisht.
Kleana Xhuveli është një juriste e re, e përfshirë në zgjedhjet e 11 majit 2025 me koalicionin “Nisma Shqipëria Bëhet”, në bashkëpunim me Adriatik Lapajn. m.p.
