Një ngjarje e rëndë tronditi ditë më parë jo vetëm qytetin bregdetar të Vlorës, por gjithë opinionin publik shqiptar, ku efektivi i Policisë së Shtetit (tani i pezulluar), Ardian Isufi së bashku me mikun e tij, Leart Bino, një person me precedentë të mëparshëm penale dhunuan për një shishe ujë kamarierin 18-vjeçar, Aron Balaj.
Lidhur me këtë ngjarje ka reaguar së fundmi dhe një prej efektivëve më të vjetër të Policisë Rrugore në Vlorë, Rexhep Llaçaj, i cili ka vendosur të flasë publikisht dhe të hedhë të tjera akuza mbi Isufin.
Llaçaj, me një karrierë prej 25 vitesh në radhët e bluve, ka akuzuar drejtpërdrejt Ardian Isufin, jo vetëm për përfshirjen e tij në ngjarjen e fundit, por edhe për fshehjen e një aksidenti të ndodhur vite më parë, më 24 janar të 2021, ku bashkëshortja dhe fëmijët e tij u përplasën nga një automjet teksa ishin duke kaluar vijat e bardha.
Si pasojë, gruaja e tij mbeti e paralizuar, ndërsa fëmijët që prej aso kohe jetojnë të traumatizuar nga ajo ngjarje, aksident i cili deri më sot nuk është hetuar asnjëherë. m.p.
