Ndërsa “telenovela” Jashari vazhdon të zgjasë mes Belgjikës dhe Italisë, Milani po punon paralelisht për të përforcuar skuadrën, sidomos në mbrojtje dhe në sulm. Trajneri Allegri ka kërkuar përforcime të qarta, me prioritet një mbrojtës të djathtë dhe një sulmues që do t’i bashkohet Santiago Gimenez.
Në krahun e djathtë të mbrojtjes, objektivi kryesor mbetet Guéla Doué i Strasburgut. Kuqezinjtë po negociojnë për të ulur kërkesat e klubit francez dhe marrëveshja mund të mbyllet në ditët në vijim.
Për sulmin, situata është më e ndërlikuar dhe nuk priten lëvizje para mesit të gushtit. Goditja në repartin ofensiv do të vijë pak para startit të kampionatit, më 23 gusht ndaj Cremoneses në “San Siro”.
Një emër që po fiton gjithnjë e më shumë terren është ai i Dusan Vlahovic. Juventus ka nevojë urgjente për ta shitur dhe kërkesat mund të zbuten, duke e bërë pistën të realizueshme për Milanin. Në skenë ka hyrë edhe Gonçalo Ramos. Sulmuesi 24-vjeçar, i transferuar te PSG nga Benfica për 65 milionë euro verën e kaluar, është ofruar nga super-agjenti Jorge Mendes. Me një rrogë prej 3 milionë eurosh, ai mund të vijë me huazim me të drejtë blerjeje.
Në dalje, Milan synon të sistemojë sa më shpejt Bennacer dhe Adli, të cilët presin oferta nga Europa. Për Bennacer ekziston interes nga Arabia Saudite, por lojtari nuk është bindur ende. Ndërkohë, pritet që Bologna të përshpejtojë për Okafor pas shitjes së Ndoye, ndërsa për Chukwueze ka vetëm interesa për huazim. m.p.
