Nëse ndonjëherë keni përdorur butonin “Share” për të ndarë një bisedë tuajën me ChatGPT, ka gjasa që ajo të jetë tashmë e “gjendshme” për këdo në internet dhe vetëm disa klikime larg në Google.
Sipas një raporti nga Cybernews, disa përdorues kanë zbuluar se linqet e krijuara për të ndarë biseda me ChatGPT, të cilat ishin menduar për bashkëpunim po indeksohen nga motorët e kërkimit, duke i bërë ato publikisht të aksesueshme.
Kur një përdorues krijon një URL të personalizuar për një bisedë me ChatGPT, ajo mund të hapet nga kushdo që e ka atë link. Por në rast se ai link shpërndahet në rrjete sociale, forume apo faqe të tjera, ai mund të kapet nga Google dhe të shfaqet në rezultatet e kërkimit. Nëse përdoruesi ka zgjedhur opsionin “Make this chat discoverable”, biseda automatikisht bëhet e indeksueshme.
OpenAI prej kohësh paralajmëron që përdoruesit të mos përfshijnë informacion të ndjeshëm në këto biseda të shpërndara. Megjithatë, shumë prej tyre janë habitur kur kanë parë përmbajtje personale të bisedave të tyre në faqet e kërkimit. Në to janë gjetur rrëfime emocionale, përjetime traumatike dhe pyetje që përdoruesit i kanë drejtuar ChatGPT për ndjeshmërinë e tij. Disa përmbajnë edhe të dhëna identifikuese si adresa email-i, emra fëmijësh, vendbanime, fotografi dhe madje mesazhe zanore.
Dane Stuckey, përfaqësues i OpenAI, ka bërë me dije përmes një postimi në rrjetin X (ish-Twitter) se kompania planifikon të heqë këtë funksion nga platforma që nga data 2 gusht. m.p.
