Izraeli pranon sulmin e qëllimshëm ndaj gazetarëve, i njohur për raportimet në vijën e frontit, në një goditje ndaj një tendë pranë spitalit al-Shifa
Lorenzo Tondo/ Jeruzalem
Një gazetar i shquar i Al Jazeera-s, i cili më parë kishte marrë kërcënime nga Izraeli, u vra së bashku me katër kolegë në një sulm ajror izraelit.
Anas al-Sharif, një nga fytyrat më të njohura të Al Jazeera-s në Gaza, u vra ndërsa ndodhej brenda një tende për gazetarë pranë spitalit al-Shifa në qytetin e Gazës, të dielën në mbrëmje.
Në total, shtatë persona humbën jetën në këtë sulm, përfshirë al-Sharif, korrespondentin e Al Jazeera-s Mohammed Qreiqeh dhe operatorët e kamerës Ibrahim Zaher, Mohammed Noufal dhe Moamen Aliwa, sipas transmetuesit me bazë në Katar.
Forcat Izraelite të Mbrojtjes pranuan sulmin, duke pretenduar se gazetari “ka shërbyer si kreu i një qelize terroriste në organizatën terroriste Hamas dhe ishte përgjegjës për avancimin e sulmeve me raketa ndaj civilëve izraelitë dhe forcave të IDF-së”.
Ata pretenduan se posedonin inteligjencë dhe dokumente të gjetura në Gaza si provë, por avokatët e të drejtave thanë se ai ishte objektiv i raportimeve të tij nga fronti i luftës në Gaza dhe se pretendimi izraelit mungonte në prova.
Tenda pranë spitalit al-Shifa ku u vranë Anas al-Sharif dhe gjashtë persona të tjerë nga një sulm izraelit. Izraeli pranoi sulmin, duke pretenduar se ai ishte militant i Hamasit, një pretendim që OKB-ja e ka cilësuar të paargumentuar.
Duke e quajtur al-Sharif “një nga gazetarët më guximtarë të Gazës”, Al Jazeera tha se sulmi ishte “një përpjekje e dëshpëruar për të heshtur zërat në pritje të pushtimit të Gazës”.
Muajin e kaluar, zëdhënësi i IDF-së, Avichai Adraee, ndau një video të al-Sharif në rrjetin X dhe e akuzoi atë si anëtar të krahut ushtarak të Hamasit. Në atë kohë, raportuesja speciale e OKB-së për lirinë e shprehjes, Irene Khan, e quajti këtë “një pretendim të paargumentuar” dhe “një sulm të hapur ndaj gazetarëve”.
Në korrik, al-Sharif i tha Komitetit për Mbrojtjen e Gazetarëve (CPJ) se jetonte me “ndjesinë se mund të bombardohem dhe të martirizohem në çdo moment”.
Pas sulmit, CPJ tha se ishte “i tronditur” nga vdekjet e gazetarëve.
“Modeli i Izraelit për të etiketuar gazetarët si militantë pa dëshmi të besueshme ngre pyetje serioze mbi qëllimet e tij dhe respektin për lirinë e shtypit,” tha drejtuesja rajonale e CPJ-së, Sara Qudah.
“Gazetarët janë civilë dhe nuk duhet të jenë kurrë objekt i sulmeve. Ata që janë përgjegjës për këto vrasje duhet të përgjigjen.”
Sindikatës së Gazetarëve Palestinezë dënoi atë që e quajti “një krim të përgjakshëm” vrasjeje.
Në janar të këtij viti, pas një armëpushimi mes Hamasit dhe Izraelit, al-Sharif tërhoqi vëmendjen e madhe kur gjatë një transmetimi të drejtpërdrejtë hoqi mbrojtjen e trupit ndërsa ishte i rrethuar nga dhjetëra banorë të Gazës që festonin ndalimin e përkohshëm të konfliktit.
Pak minuta para vdekjes, al-Sharif postoi në X: “Lajm i fundit: Bombardime intensive, të përqendruara izraelite me ‘breza zjarri’ po godasin zonat lindore dhe jugore të qytetit të Gazës.”
Në një mesazh të fundit, që Al Jazeera tha se ishte shkruar më 6 prill dhe postuar në llogarinë e tij në X pas vdekjes, gazetari shkroi se kishte “jetuar dhimbjen në të gjitha detajet e saj, kishte shijuar vuajtjen dhe humbjen shumë herë, por kurrë nuk u tremb të transmetonte të vërtetën ashtu siç është, pa deformim apo falsifikim.”
“Allah mund të dëshmojë kundër atyre që heshtën, atyre që pranuan vrasjet tona, atyre që mbytën frymën tonë dhe zemrat e tyre nuk u prekën nga mbetjet e shpërndara të fëmijëve dhe grave tona, pa bërë asgjë për të ndalur masakrën që populli ynë ka përjetuar për më shumë se një vit e gjysmë,” vazhdoi ai.
28-vjeçari la pas një grua dhe dy fëmijë të vegjël. Babai i tij u vra nga një sulm izraelit në shtëpinë familjare në kampin e refugjatëve Jabalia në qytetin e Gazës në dhjetor 2023. Në atë kohë, al-Sharif tha se do të vazhdonte të raportonte dhe refuzoi të largohej nga veriu i Gazës.
Një gazetar tjetër i Al Jazeera-s në Gaza, Hani Mahmoud, tha: “Kjo ndoshta është gjëja më e vështirë që raportoj në 22 muajt e fundit. Nuk jam larg spitalit al-Shifa, vetëm një bllok larg, dhe mund të dëgjoja shpërthimin e madh që ndodhi para pak çastesh, afër spitalit.”
“Mund ta pashë kur ndriçoi qiellin dhe brenda pak minutash u përhap lajmi se ishte kampi i gazetarëve pranë portës kryesore të spitalit al-Shifa.”
Al-Sharif dhe kolegët e tij kanë raportuar nga Gaza që nga fillimi i konfliktit.
“Është e rëndësishme të theksohet se ky sulm ndodhi vetëm një javë pasi një zyrtar ushtarak izraelit e akuzoi drejtpërdrejt Anas-in dhe nisi një fushatë nxitjeje kundër Al Jazeera-s dhe korrespondentëve në terren për shkak të punës së tyre dhe raportimeve të vazhdueshme mbi urinë, mungesën e ushqimit dhe kequshqyerjen,” shtoi Mahmoud.
Izraeli ka vrarë disa gazetarë të Al Jazeera-s dhe familjarë të tyre, përfshirë Hossam Shabat, i vrarë në mars, dhe Ismail al-Ghoul me kameramanin e tij Rami al-Rifi, të vrarë në gusht.
Gruaja, djali, vajza dhe nipi i korrespondentit kryesor Wael al Dahdouh u vranë në tetor 2023 dhe ai vetë u plagos në një sulm disa javë më vonë që vrau kameramanin e Al Jazeera-s Samer Abu Daqqa.
Izraeli, i cili nuk lejon gazetarët e huaj të hyjnë në Gaza dhe që ka targetuar gazetarët lokalë, ka vrarë 237 gazetarë që prej fillimit të luftës më 7 tetor 2023, sipas zyrës së mediave të qeverisë së Gazës. Komiteti për Mbrojtjen e Gazetarëve thotë se të paktën 186 gazetarë janë vrarë në konfliktin në Gaza. Izraeli mohon se i ka qëllimshëm sulmuar gazetarët.
*Me Reuters dhe Agence France-Presse. Përgatiti për botim: L.Veizi
