Sot ndodh takimi i shumëpritur.
Bashkimi i udhëheqësve evropianë, si dhe i shefit të NATO-s, me Presidentin ukrainas Volodymyr Zelensky për bisedime me Presidentin amerikan Donald Trump në Washington e bën atë një takim të nivelit shumë të lartë.
Njëherazi zbulon se sa i madh është shqetësimi i tyre se Trump do ta ndihmojë Presidentin rus Vladimir Putin të mposhtë Ukrainën duke mbështetur kërkesat e tij – të tilla si mungesa e armëpushimit para zgjidhjes përfundimtare.
Po ashtu tregon se sa të shqetësuar janë liderët evropianë se mund të shkojmë drejt një takimi tjetër shpërthyes në Shtëpinë e Bardhë dhe se Zelensky ka nevojë për mbështetje për të shmangur një përsëritje të grindjes që ndodhi në shkurt.
Gjatë një ore e gjysmë, një mori udhëheqësish evropianë kanë njoftuar se do t’i bashkohen Presidentit Zelensky të hënën.
Ata janë: Kryeministri i Mbretërisë së Bashkuar Keir Starmer, Kryeministrja italiane Giorgia Meloni, Kancelari gjerman Friedrich Merz, Presidenti finlandez Alexander Stubb, Presidenti francez Emmanuel Macron, Sekretari i Përgjithshëm i NATO-s Mark Rutte dhe Presidentja e Komisionit Evropian Ursula von der Leyen.
Lista i ngjason udhëheqësve që u takuan virtualisht të mërkurën – përpara bisedimeve të Trump dhe Putin në Alaskë.
Menaxhimi i Trump është pjesë e operacionit diplomatik këtu – veçanërisht në dritën e asaj që ndodhi herën e fundit që Presidenti Zelensky shkoi në Washington DC, dhe sa katastrofik shkoi takimi me ato skena zemërimi para medias në Zyrën Ovale.
Është një moment i paprecedentë – me një numër shumë të konsiderueshëm të “koalicionit të vullnetshëm” që tani kanë konfirmuar se do të marrin pjesë në një takim në Shtëpinë e Bardhë.
Një objektiv kryesor do të jetë të shtyhet përpara nevoja për garanci sigurie për Ukrainën pas një marrëveshjeje paqeje – jo vetëm që anëtarësimi i Ukrainës në NATO nuk është realisht në tryezë.
Ata gjithashtu do të duan të ngrenë “çështje territoriale” me Presidentin Trump dhe të theksojnë mbështetjen e tyre të vazhdueshme për Ukrainën.
Ai që fillimisht ishte një takim dypalësh midis Trump dhe Zelenskyt tani duket se është rritur – megjithëse një takim kokë më kokë mund të zhvillohet ende – me një mori udhëheqësish evropianë që tani zbresin për një audiencë të përbashkët me presidentin e SHBA-ve.
Ata që kanë një marrëdhënie të mirë me Trump kanë bërë sa më shumë që munden për të fituar favore në emër të Presidentit Zelensky, veçanërisht që nga ai takim pranveror në Shtëpinë e Bardhë.
Ka qartë njëfarë nervozizmi midis udhëheqësve evropianë pas samitit të Alaskës midis presidentëve Trump dhe Putin.
Veçanërisht për këtë arsye ata po udhëtojnë në shumës për t’ia çuar këtë mesazh presidentit të SHBA-ve.
Në një deklaratë për konfirmimin e prezencës në takimin e Washington-it, zyra e Starmer bëri me dije se “kjo vjen pas përgëzimit të Kryeministrit nga përpjekjet e Presidentit Trump për t’i dhënë fund luftës së paligjshme të Rusisë në Ukrainë, riafirmimit të qëndrimit të tij se rruga drejt paqes nuk mund të vendoset pa Presidentin Zelensky dhe bashkë-kryesimit të një takimi të Koalicionit të Vullnetit këtë pasdite për të diskutuar progresin për t’i siguruar Ukrainës garanci të forta sigurie në rast të ndonjë marrëveshjeje”.
“Në takimin që do të zhvillohet nesër në Shtëpinë e Bardhë, Kryeministri, me partnerë të tjerë evropianë, është i gatshëm të mbështesë këtë fazë tjetër të bisedimeve të mëtejshme dhe do të riafirmojë se mbështetja e tij për Ukrainën do të vazhdojë për aq kohë sa të duhet”.
Kurse në një deklaratë të lëshuar nga zyra e presidencës franceze u tha se udhëheqësit do të ndjekin “koordinimin midis evropianëve dhe Shteteve të Bashkuara me qëllim arritjen e një paqeje të drejtë dhe të qëndrueshme që ruan interesat jetësore të Ukrainës dhe sigurinë e Evropës”.
Sipas zëdhënësit të Merz, “udhëtimi do të shërbejë si një shkëmbim informacioni me Presidentin e SHBA-ve Donald Trump pas takimit të tij me Presidentin rus Vladimir Putin në Alaska”.
“Kancelari Merz do të diskutojë statusin e përpjekjeve për paqe me krerët e shteteve dhe qeverive dhe do të nënvizojë interesin e Gjermanisë për një marrëveshje të shpejtë paqeje në Ukrainë”.
“Bisedimet do të trajtojnë, ndër të tjera, garancitë e sigurisë, çështjet territoriale dhe mbështetjen e vazhdueshme për Ukrainën në mbrojtjen e saj kundër agresionit rus. Kjo përfshin ruajtjen e presionit të sanksioneve”, shtoi ai./e.t
