Mariola Nakoleci, 36 vjeçe dhe nënë e katër fëmijëve, është vrarë nga bashkëshorti i saj në zonën e Volosit në Greqi. Ajo është qëlluar disa herë me thikë nga Pandeli Nakoleci, në sy të fëmijëve dhe më pas në tentativë për t’u larguar, ka marrë goditjen finale në sheshpushimin e pallatit.
Vajza e madhe ka folur mediat greke dhe ka thënë se prindërit e saj kishin grindje të shpeshta. Këtë mëngjes, ndërsa e gjithë familja ishte në shtëpi, shpërtheu një tjetër grindje dhe më pas 40-vjeçari shqiptar mori thikën dhe ia nguli në qafë dhe shpinë gruas.
“Nuk e di pse u grindën”, tha vajza e tyre, e cila zbuloi, megjithatë, se 40-vjeçari ishte xheloz për nënën e saj dhe për një kohë ajo e kishte larguar nga shtëpia. Ajo vrapoi për të shpëtuar duke u larguar nga apartamenti.
Mirëpo, Pandeli Nakoleci e ndoqi poshtë shkallëve dhe në hyrje të pallatit e goditi përsëri. Mariola ra mbi xham dhe autori, duke e parë të mbuluar me gjak në dysheme, iku me vrap. Policia ka nisur një kërkim për ta gjetur dhe arrestuar atë.
Sipas informacioneve nga protothema.gr, nuk kishte histori dhune në familje, megjithatë, autori ishte përdorues droge dhe kishte tentuar vetëvrasje në qershor. Hetimet janë në kulmin e tyre, ndërsa autoritetet po shqyrtojnë shkaqet që çuan në krimin brutal. m.p.
