Kryeministri Edi Rama deri më tani ka heshtur për emrat e kabinetit të ri qeveritar. Ndryshe nga ai, Sali Berisha flet me emra teksa pohon se lufta më e madhe po bëhet për Ministrinë e Brendshme. Në një konferencë për mediat, lideri i Partisë Demokratike deklaroi se kartelet e drogës po përplasen me njëri-tjetrin, për të influencuar zgjedhjet e Kryeministrit.
“Priten përleshje të mëdha midis tyre, kush të marrë Ministrin e Brendshëm. Troplinët me Agasin janë për Vlora Hysenin. E keni marrë vesh besoj. Të tjerë janë për atë Dyrmishin. Ata e lanë Arkend Ballën dhe duan Vlorën tani. Këta të Elbasanit nuk heqin dorë nga Taulanti. Tani, betejat po zhvillohen midis klaneve, karteleve të drogës”, tha Berisha.
Kryedemokrati komentoi edhe idenë për ndryshimin e strukturës së komisioneve parlamentare, ku tashmë integrimi pritet të mos drejtohet nga opozitarët. “Komenti im është ky. Edi Rama i tmerruar nga krimet që ka kryer, nga farsa elektorale, nga damkosja tani me vetëkuptim, si anëtar i organizatës kriminale Sorosiane, është i aftë të marrë çdo vendim në verbëri. Por ju garantoj ju, se opozita do të qëndrojë fuqishëm me dritën e transparencës”.
Premtoi se shumë shpejt do të nisë aksioni opozitar, por luftën si fillim po e bën me Xhorxh Soros, të cilin e sulmoi sërish lidhur me vendimin e Presidentit të SHBA, Donald Trump, që kërkoi hetim për aktivitetin e tij. “Unë i bëj thirrje FBI-së të hetojë me hollësi të gjitha udhëtimet e çarterit të Edi Ramës dhe të gjitha udhëtimet e çarterit të Aleks Soros për të kuptuar të gjithë dimensionin e veprimtarisë kriminale të këtyre delinkuentëve ndërkombëtarë. Garantoj Edi Ramën se PD do bëjë gjithçka për desorosizimin e këtij vendi, për të nxjerrë Shqipërinë nga narkoshtet, republikë e Xhorxh Sorosit, në një republikë të ligjit, qytetarëve të saj”.
Berisha edhe në këtë konferencë kërkoi reagim nga kryeministri për këtë çështje. m.p.
