Presidenti i Rusisë, Vladimir Putin, deklaroi se ka arritur “marrëveshje” me Presidentin amerikan Donald Trump gjatë takimit të tyre në Alaskë muajin e kaluar, në lidhje me përfundimin e luftës në Ukrainë.
Megjithatë, ai nuk dha detaje nëse do të pranonte bisedime paqeje me Presidentin ukrainas Volodymyr Zelensky, të ndërmjetësuara nga Trump, i cili thuhet se kishte vendosur të hënën si afat për përgjigjen e Putinit.
Duke folur nga Kina gjatë një samiti të Organizatës së Bashkëpunimit të Shangait në Tianjin, Putin vazhdoi të mbrojë vendimin e tij për të pushtuar Ukrainën, duke fajësuar sërish Perëndimin për fillimin e luftës.
Pas takimit në Alaska, i dërguari i posaçëm amerikan, Steve Witkoff, deklaroi se Putin kishte pranuar ofrimin e garancive të sigurisë për Ukrainën si pjesë e një marrëveshjeje të mundshme paqeje, megjithëse Moska ende nuk e ka konfirmuar zyrtarisht.
Në samit, Putin u takua me Presidentin kinez Xi Jinping dhe Kryeministrin indian Narendra Modi, duke i falenderuar për mbështetjen e tyre dhe për përpjekjet në “lehtësimin e zgjidhjes së krizës ukrainase”.
Kina dhe India mbeten blerësit më të mëdhenj të naftës ruse, gjë që ka nxitur kritika nga Perëndimi se po e mbështesin ekonominë ruse, e cila është goditur rëndë nga lufta.
Putin theksoi se “marrëveshjet e arritura” me Trump janë “një hap drejt paqes në Ukrainë”.
Megjithatë, ai përsëriti pretendimin se lufta nuk nisi për shkak të agresionit rus, por si rezultat i një grushti shteti në Ukrainë, të mbështetur nga Perëndimi, si dhe përpjekjeve të vazhdueshme për ta futur Ukrainën në NATO, pretendime që janë hedhur poshtë vazhdimisht nga aleatët perëndimorë.
Putini aneksoi Krimenë në vitin 2014 dhe mbështeti grupet separatiste në lindje të Ukrainës, ndërsa në shkurt 2022 urdhëroi pushtimin e plotë të vendit.
Komentet e tij të fundit vijnë pak ditë pas një prej sulmeve më të mëdha ajrore të Rusisë ndaj Ukrainës që nga fillimi i luftës. Vetëm javën e kaluar, Moska lëshoi 629 dronë dhe raketa drejt Kievit, duke vrarë 23 persona, ngjarje që nxiti reagime të ashpra nga liderët evropianë. m.p.
