Hakerimi është një nga përpjekjet për të shfrytëzuar një sistem kompjuterik ose një rrjet privat brenda një kompjuteri. Në ditët e sotme është një nga fenomenet më kërcënues në lidhje me të dhënat personale dhe identitetin. Qasja e paautorizuar bëhet për një qëllim të paligjshëm.
Prej ditës së sotme, vjedhja e llogarive në Twitter të disa prej personaliteteve më të rëndësishëm në botë është kryelajmi i mediave dhe rrjeteve sociale.
Llogaritë në Twitter të ish-presidentit Barack Obama, të yllit Kim Kardashian dhe bashkëshortit të saj Kanye West, të miliarderit të Tesla-s Elon Musk, të Bill Gates e plot të tjerëve janë vjedhur.
Përmes postimeve në rrjetet sociale, kanë reaguar zyrtarisht edhe disa prej “viktimave” të këtij sulmi kibernetik, si Elon Musk apo Barack Obama.
Pas ngjarjes, ka ardhur edhe reagimi zyrtar i zëdhënësit të Twitter-it që është shprehur se gjithçka po shihet me shumë prioritet dhe kujdes.
“Kemi të bëjmë me një sulm të koordinuar të inxhinierisë sociale, nga njerëz që arritën me sukses tek disa prej punonjësve tanë me akses në sistemet dhe mjetet tona të brendshme.
Ne dimë se sulmi është përdorur për të marrë kontroll të disa llogarive të verifikuara”, është shprehur ai./Sa.Ka/Fjala.al
