Presidenti Ilir Meta ka marrë pjesë ditën e sotme në Ansamblin “Kuvendi i Zall Dardhës”, në Dibër.
Përmes një postimi në rrjetet sociale, Meta shkruan se “Trimërinë dhe heroizmin e dibranëve në luftërat për mbrojtjen e territorit dhe identitit tonë kombëtar, populli e ka përjetësuar në këngë”. Kreu i shtetit thekson se një ndër këngët më të dashura për të është edhe kënga e Hajredin Pashës.
Postimi i Metës:
“Dibra ngeli përherë bastioni dhe barrikada e parë e betejave ndaj vërshimit të hordhive të ushtrive pushtuese në kufirin verilindor të shqiptarëve.
Trimërinë dhe heroizmin e dibranëve në luftërat për mbrojtjen e territorit dhe identitit tonë kombëtar, populli e ka përjetësuar në këngë.
Padyshim një ndër më të veçantat, dhe një nga më të dashurat për mua është edhe Kënga e Hajredin Pashës.
Por më të jashtëzakonshme e bëri për mua, këngëtarja më e re e Ansamblit “Kuvendi i Zall Dardhës”, Elisa Skarra, vogëlushja 10-vjeçare, që të mahnit jo vetëm me talentin e jashtëzakonshëm, por edhe me dashurinë e madhe për Atdheun e rrënjët e të parëve.
Një falenderim të veçantë kam për prindërit e saj që kanë mbajtur gjallë traditat dhe kanë trashëguar tek brezi më i ri vlerat tona më të mira kombëtare. Model frymëzimi për të gjithë!
Ju përshëndes me këtë interpretim virtuoz të artistes sonë Elisa Skarra”, shkruan Meta.
Pa.Va/Fjala.al
