Kreu i FSHF-së: “Nuk jep me Kombëtaren aq sa jep me Napolin”. Presidenti i Federatës Shqiptare të Futbollit Armando Duka kritikoi kapitenin e Shqipërisë Elseid Hysajn për paraqitjet e fundit me kombëtaren.
Duke folur për radion italiane, “Radio Kiss Kiss”, kreu i organizmit që qeveris futbollin shqiptar ka theksuar se futbollisti shkodran nuk jep maksimumin me ekipin kombëtar njësoj si me Napolin, ndërsa ka prekur edhe çështjen e refuzimit të Napolit për të zhvilluar sfidën e kaluar në Serinë A me Juventusin.
“Ai ka luajtur shumë mirë në dy ndeshjet e para me Napolin, më vjen keq që nuk ka bërë të njëjtën gjë me ne në kombëtare”, – ka thënë Duka, duke folur për kapitenin kuqezi. “Ne presim shumë prej tij”, – ka shtuar ai. Në fakt, Hysaj ka qenë në qendër të kritikave për Kombëtaren, veçanërisht për paraqitjen e tij të dobët në humbjen e papritur me Lituaninë në Tiranë në shtator. Ndërkaq, në cilësinë e anëtarit të Komitetit Ekzekutiv të UEFA-s, Duka u shpreh se klubi napolitan duhej të zhvillonte sipas programit takimit.
Ai theksoi sipas rregullores se nëse 13 lojtarë në një skuadër janë infektuar me virusin korona, takimi mund të luhet, por kur ka 2-3 raste, ndeshja duhej të luhej normalisht. “Nëse një ekip ka në dispozicion të paktën 13 futbollistë pa viruse, atëherë ndeshja mund të luhet”, – ka thënë kreu i FSHF-së. “Nëse skuadra ka më pak se 13 lojtarë në dispozicion, ndeshja zhvillohet në një datë tjetër”, – ka vijuar ai.
“Dhe nëse nuk luan dot as herën e dytë, atëherë UEFA mer vendim. Kur ke 2-3 raste pozitive me Covid-19, ndeshja duhet të zhvillohet. Napoli duhej të udhëtonte drejt Torinos, pavarësisht refuzimit të presidentit Aurelio De Laurentis. Napoli është përgjegjës që e humbi takimin 3-0 në tavolinë. Duhej të luanin kundër Juventusit. Për këtë situatë vendos Komiteti Disiplinor”, – ka përfunduar Presidenti i Federatës Shqiptare të Futbollit Armand Duka.
La.Mi/Fjala.al
