Agresioni dhe plagosja e dyfishtë në vilën e një biznesmeni në Allias, tashmë njeh dy të dyshuar. Policia pretendon se ka mundur të shkojë deri tek mekanizmi se si ka ndodhur gjithë ngjarja e rëndë.
Historia që duket se zë fill nga një punonjës i punishtes në katin e parë të vilës së sulmuar me armë, ka vijuar nga 3 persona. Dy mendohet se kanë hyrë brenda dhe një i tretë ka qëndruar në rrugë me mjet për të kryer edhe lëvizjen.
Dëshmitë e njëpasnjëshme të dhënë nga Afërdita Laze dhe e bija, kanë bindur hetuesit që agresorët dhe plagosësit e tyre janë djem të zonës, që njohin mirë mënyrën se si grabitet, pasi njëri prej tyre mësohet se është edhe me precedentë të mëparshëm kriminalë në këtë fushë.
Sipas të dhënave të policisë saktësohet se mbrëmë ka mundur të flasë edhe Petrit Laze, kryefamiljari që ka dalë tashmë nga gjendja e rëndë shëndetësore. Ai ka rrëfyer detaje të rëndësishme për hetimin, pasi është ngritur edhe më vonë se sa gruaja dhe vajza që janë përballur me dy djemtë e armatosur.
Nga të komunikuarit me ta, Petrit Laze ka kuptuar se ata kanë qenë në dijeni të gjithë shumës që ai mbante në shtëpi. Ata i kanë kërkuar çelësin e kasafortës e për pasojë ai ka refuzuar.
Ka qenë ky pikërisht shkaku që e kanë qëlluar me plumb në bark, me idenë për ta detyruar që ai të tregonte. Madje burri ka treguar se kanë tentuar edhe ta lidhnin, për shkak se ka qenë i fuqishëm fizikisht.
Por vajza e çiftit, nga dhoma e gjumit e vetja ka telefonuar dajën e vet e për pasojë është vënë shpejt në lëvizje edhe policia, lëvizje që në fakt rezultoi shumë vonë për të ndërhyrë të paktën në kushte flagrance.
Ndonëse kjo gjë nuk ndodh thuajse në asnjë rast të tillë, plagosja e dyfishtë në atë orë në një banesë që është vetëm pak 2-3 minuta larg një komisariati policie, është alarm i madh për gjendjen në të cilën gjendet ‘ndihma e parë policore’! n.k/Fjala.al/
