Gazetarët Arion Sulo dhe Adriatik Doçi kanë komentuar sonte përplasjet në SPAK mes socialistëve dhe demokratëve që kanë paditur njëra-tjetrën për inceneratorët dhe privatizimin e ish-klubit sportiv ‘Partizani’.
Doçi përmes një lidhje direkte u shpreh se mes palëve politike ekziston mjë marrëveshje e fshehtë për të mos e ndëshkuar njëra-tjetrën.
“Gjithmonë para zgjedhjeve kemi kallëzime që shuhen me kalimin e kohës. Inceneratorët apo privatizimi i ‘Partizanit’ do kenë fatin e padive për lobimin rus të Lulzim Bashës apo aferës së CEZ. Pra te dy paditë mund të jenë një bllof para-elektoral” – tha Doçi.
Për Arion Sulon, nga gazeta ‘Liberale’ nga SPAK kërkohen prova për dhe jo hetime kryesisht.
“Unë mendoj që këto janë skeletet në dollap që ka politika shqiptare. Disa nga këto çështje kanë afera të rënda brenda dhe të gjitha palët kanë bërë mëkate ekonomike në emër të mbajtjes së pushtetit. Që nga korrupsioni e deri te veprat penale.
Po pse këto çështje dalin pikërisht tani? Modesisht unë mendoj se qeveria ka nisur një fushatë negativiste dhe atipike.
Por këto dalin tani sepse qeveria është në vështirësi prej pandemisë dhe ndotja e kundërshtarit është mënyra më e mirë për të dhënë llogari për bilancet dhe premtimet e pambajtura. Konsumimi i këtyre çështjeve në këtë formë është mëkat sepse aty ka lëndë edhe për drejtësinë” – tha Sulo në lidhjen direkte me ‘Java në RTSH’.
