Ditën e djeshme ndërroi jetë Ilir Adili, themelues, aksioner dhe Drejtor i Përgjithshëm i AK INVEST.
Për ketë ka reaguar edhe Banka e Shqipërisë me në krye Guvernatorin, Gent Sejko.
“Sektori financiar dhe fusha e sipërmarrjes shënuan dje një humbje të madhe. Ilir Adili, me një përvojë të spikatur në administratën shtetërore, ndër pionierët e parë të sistemit bankar shqiptar, si dhe ekspert në fushën e shërbimeve financiare, është ndarë nga jeta për shkak të komplikacioneve të shkaktuara nga Covid-19. Prej rreth 25 vitesh i angazhuar në sipërmarrjen financiare, z. Adili ka nisur aktivitetin fillimisht në fushën e këmbimeve valutore, duke u zgjeruar në vijim në fushën e transfertave, pagesave e më pas në kreditim.
I njohur mes miqve dhe bashkëpunëtorëve si novator, i gatshëm për të bashkëpunuar dhe për të sjellë risi në fushën e pagesave, ai ishte edhe një prej themeluesve të ALSE, Bursa Shqiptare e Titujve, duke treguar kontributin e tij për zhvillimin e vazhdueshëm të tregjeve financiare në vend.
Guvernatori Sejko i shpreh ngushëllimet e sinqerta për këtë humbje të parakohshme, familjes, miqve dhe bashkëpunëtorëve të sektorit financiar!”, thuhet në mesazhin e Bankës së Shqipërisë
