Një e kuqe ëndrrash. Kështu është quajtur motori i ri ““Dukati”, që do të konkurrojë në Botërorin e 2021-shit në Moto GP. Do të jenë Miller dhe Banjaja, pilotët me të cilët do të përfaqësohet skuadra italiane në këtë Botëror dhe, synimi kryesor është, fitimi i titullit botëror për konstruktorë. Kështu, më e kuqe se herët e tjera, ka qenë ngjyra e motorit “Dukati”, që do të garojë në vitin 2021. Ai është prezantuar të mërkurën nga “Dukati” “Dezmosediçi”, me të cilin Françesko Banjaja dhe Xhek Miller, do të nisin sezonin në 28 mars 2021, në Losail, në Çmimin e Madh të Katarit.
E objektivi është që të konfirmojnë titullin e kampionit të botës për konstruktorë, të fituar edhe në 2020-ën. Emocione dhe padurim për të zbritur në pistë. Këto janë fjalët e 24-vjeçarit nga Torino dhe pilotit australian, gjatë prezantimit të motorit të ri, me të cilin të dy pilotët zyrtarë të “Dukati”-t, do të garojnë në 2021. “Emocionet që ndjeva, kur pashë “Dezmosediçin tim dhe kur vesha kostumin e ri, janë me të vërtetë të jashtëzakonshme, – ka thënë Xhek Miller. – M’u desh një rrugë e gjatë për të arritur deri këtu. Mezi pres të nis aventurën e re dhe të arrij rezultate të rëndësishme.”
Ndërsa Françesko Banjaja ka shprehur kënaqësinë dhe përgjegjësinë që do të ketë në drejtimin e këtij motori. “Do të jetë një sezon i rëndësishëm për mua, sepse për herë të parë, do të përfaqësoj ngjyrat e një skuadre zyrtare, – tha piloti i ri italian. – Të bëhesha pjesë e skuadrës zyrtare të “Dukati”-t, ka qenë gjithnjë ëndrra ime. Do të jap maksimumin për të mos zhgënjyer pritshmëritë.” Sezoni i Moto GP 2021, është parashikuar të nisë zyrtarisht në 5 mars 2021 në Katar.
