Rasti i një gruaje franceze ka përfunduar në Gjykatën Europiane për të Drejtat e Njeriut, duke e çuar në një nivel tjetër debatin për raportet seksuale dhe integritetin fizik të gruas në martesë.
Rasti në fjalë e ka origjinën në një divorc për shkak të refuzimit të gruas për marrëdhënie seksuale. Tre shkallët e gjyqësorit francez e bënë gruan fajtore për divorcin.
Në shkallën e parë, gjykatësit vendosën divorcin e çiftit, për faktin se martesa nuk konsumohej, duke marrë parasysh se faktet, “të konfirmuara edhe nga vetë gruaja, përbëjnë një shkelje të rëndë dhe të përsëritur të detyrimeve të martesës, të cilat e bëjnë të pamundur vijimin e bashkëjetesës”.
Gjykata e Apelit e Versajës (Paris) mbajti të pandryshuar vendimin në vitin 2019, duke e sanksionuar gruan për refuzimin e marrëdhënies me burrin e saj.
Vendimi i Gjykatës së Apelit u konfirmua më pas edhe nga Gjykata e Lartë, raporton ANSA.
Përfundimisht, gruaja paditi drejtësinë franceze në Gjykatën Evropiane të të Drejtave të Njeriut për “ndërhyrje në jetën private” dhe “shkelje të integritetit fizik”, thonë dy shoqata që e ndihmojnë dhe e mbështesin atë në betejën e saj ligjore dhe civile.
Dy shoqatat në mbështetje të grave, Fondacioni për Gratë dhe Kolektivi Feminist Kundër Përdhunimit, dënojnë faktin se drejtësia franceze “vazhdon të vendosë për detyrimin martesor”, “duke mohuar kështu të drejtën e grave për t’i miratuar ose jo marrëdhëniet seksuale”. Të dy shoqatat kujtojnë se “në 47% të 94 000 përdhunimeve dhe tentativave të dhunës seksuale të regjistruara çdo vit, agresori është bashkëshorti ose ish-bashkëshorti i viktimës”.
“Martesa – përfundojnë të dy shoqatat duke kërkuar dënimin e Francës – nuk është dhe nuk duhet të jetë një shërbim seksual”. /mcntv.al/
