Një 17-vjeçare ka rrëfyer se është ajo autorja e vrasjes së një 45-vjeçari në Bari, Itali. Vajza, e shoqëruar nga nëna e saj dhe në prani të avokatit, i tha prokurorit për të mitur se ajo kishte goditur me thikë burrin gjatë një konflikti në rrugë që u zhvillua mbrëmjen e së enjtes në rrethin Libertà, të Bari.
Adoleshentja fillimisht u mor si dëshmitare e ngjarjes, ndërsa pasi bëri deklaratën se ishte ajo autorja, u mor në pyetje si e dyshuar.
“Ai donte të më vriste mua dhe nënën time dhe unë duhej të mbrohesha”, tha 17-vjeçarja mes lotëve. Ajo ishte plagosur në fytyrë dhe, si reagim kishte goditur me thikën që kishte me vete 45-vjeçarin.
