Misioni i OSBE-ODIHR ka publikuar sot raportin paraprak mbi mbarëvajtjen e zgjedhjeve të 25 Prillit në Shqipëri. Përmbledhtazi, raporti thekson se zgjedhjet ishin përgjithësisht të mirëorganizuara nga Komisioni Qendror i Zgjedhjeve dhe gjithashtu vëren se dita e votimit ishte e qetë dhe pa incidente.
Megjithatë, siç kanë vërejtur edhe vëzhguesit e OSBE-ODIHR, fushata është dominuar nga disa tensione të pjesshme që buronin nga nga thirrjet për dhunë të Presidentit të Republikës, ankesave për rrjedhje të të dhënave personale për shkak të angazhimit të stukturave partiake në monitorimin e votuesve, si dhe akuzave ndaj mazhorances për përdorimin e burimeve qeveritare gjatë fushatës.
Shqetësimet për sjelljen e Presidentit vihen në dukje që në krye të raportit, në faqen 2, ku theksohet shqetësimi i OSBE-ODIHR për faktin se Presidenti keqpërdori tagrat e institucionit që ai përfaqëson për të bërë fushatë kundër qeverisë. Sjellja tërësisht jashtë kornizës institucionale e Presidentit trajtohet gjerësisht nga raporti, i cili ndër të tjera shprehet gjithashtu se toni dhe fjalori i përdorur nga liderët politikë, dhe në vecanti nga Presidenti i Republikës, ishte konfrontues dhe i zjarrtë.
Misioni i OSBE-ODIHR ndalet edhe tek situata e mediave në vend, duke listuar një sërë problematikash si ndikimi i pronarëve të medias që sjell në vetëcensurim të gazetarëve, kasetat e gatshme të përpunuara nga partitë politike, hapësira e ulët mediatike për partitë e vogla etj.(Tema)
