“Nëse Rusia na sulmon, duhet bërë kujdes edhe me Ballkanin”, ka qenë kjo një deklaratë paralajmëruese e ministres ukrainase Julia Laputina. Ish-oficerja e zbulimit ushtarak të këtij vendi është një njohëse e mirë e taktikave ushtarake ruse. Ajo duket se po paralajmëron përmes këtij skenari Perëndimin, për shpërthimin e një Lufte të Tretë Botërore.
“Nëse Rusia na sulmon, duhet bërë kujdes edhe me Ballkanin. Shini ç’po bëjnë rusët aktualisht në Serbi. Ata po përpiqen të provokojnë tensione në Ballkan dhe kjo na sjell në kujtesë se si filloi Lufta e Dytë Botërore. Në aspektin gjeopolitik, ky është një skenar i mundshëm. Pra, duhet t’i kushtojmë vëmendje çështjes së Ukrainës për sigurinë e të gjithë kontinentit”.-tha Laputina.
Shenjat që vërtetojnë paralajmërimet e ministres ukrainase vijnë nga Bosnja. Rajoni autonom i serbëve ka nisur një proces shkëputjeje nga ky vend, i mbështetur edhe nga Serbia.
Një ndër hapat është edhe përpjekja për të krijimin e një ushtrie më vete, përmes shkëputjes së trupave të tyre nga forcat e përbashkëta të armatosura të Bosnje-Hercegovinës. Rusia kërkon nga Perëndimi nënshkrimin e një pakti që garanton se Ukraina nuk do të antarësohet në NATO. Por Presidenti amerikan Joe Biden refuzon.
Nëse sulmohet Ukraina, Bashkimi Europian ka kërcënuar Moskën me sanksione të paprecedenta, prej të cilave ekonomia dhe shoqëria ruse do të kenë pasojat më të rënda në histori. Udhëheqësit evropianë përfunduan sot takimin ku u zotuan të nxisin Rusinë të rikthehet tek bisedimet e paqes me Ukrainën. Ata gjithashtu rikonfirmuan se do të vendosin sanksione të paprecedenta ndaj Moskës, nëse forcat ruse kalojnë kufirin ukrainas.
