Është vënë në pranga ditën e sotme Mariglen Isufi, 28-vjeçari, i cili akuzohet nga policia se fshehu trupin e vdekur të shokut të tij.
Mësohet se një ditë më parë u gjet pa jetë 36-vjeçari Ilir Marku në një bunker në zonën e Institutit në Tiranë. I riu dyshohet se ka ndërruar jetë nga mbidoza, ndërsa shoku i tij fshehu trupin.
Kujtojmë se ai ishte denoncuar i zhdukur një ditë më parë nga familja dhe i shpallur në kërkim.
Njoftimi i plotë i policisë:
Fshehu në një bunker trupin e shokut që kishte ndërruar jetë duke penguar zbulimin e të vërtetës, vihet në pranga 29-vjeçari.
Specialistët për Hetimin e Krimeve në Komisariatin e Policisë Nr. 3 bënë arrestimin në flagrancë të shtetasit:
– M. I., 29 vjeç, banues në Tiranë, për veprën penale “Veprime që pengojnë zbulimin e dë vërtetës”.
Sipas veprimeve hetimore të kryera, ka rezultuar se shtetasi M. I., është lidhje shoqërore me shtetasin I. M., 36 vjeç, i cili u gjet ditën e djeshme, në një bunker, pa shenja jete dhe pa shenja dhune.
Nga verifikimet e kryera ka rezultuar se këta dy shtetas, më datë 17.04.2022, kanë qenë duke konsumuar lëndë narkotike, dhe shtetasi I. M., ka gjetur vdekjen, ndërsa shtetasi M. I., ka transportuar trupin e të ndjerit në bunker, duke kryer veprime që pengojnë zbulimin e të vërtetës.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
