Liqeni i Farkës po transformohet dita-ditës, duke u shndërruar në një nga hapësirat më të këndshme të kryeqytetit, për të kaluar pasditet dhe jo vetëm.
Parku i liqenit do rivitalizohet përmes një projekti të ri transformimi nga Bashkia e Tiranës.
Kryetari i Bashkisë së Tiranës, Erion Veliaj, ka inspektuar punimet që po kryhen, duke nënvizuar faktin se kjo hapësirë do t’i shërbejë të gjithëve.
“E gjithë Farka është kthyer në një kantier këto kohë. E di që një kantier i ka lanë stafetën një kantieri tjetër, por më vjen mirë që mbajtëm premtimin për ekipin e volejbollit. Kemi pallat sporti në Farkë, ndoshta më të mirin që kemi sot në Tiranë. Ndihem shumë mirë që në nivel kapilar ne kemi shkuar në çdo rrugicë”, deklaroi Veliaj.
Kryebashkiaku i Tiranës solli në vëmendje se askush nuk mund ta imagjinonte vetëm pak vite më parë që në Liqenin e Tiranës do zhvillohej një event i përmasave të “Sunny Hill Festival”. Ai tha se kjo situatë sot ishte paimagjinueshme më përpara kur i gjithë Parku Liqenit ishte kthyer në një landfill.
“Sot jemi në të njëjtën situatë ku ne duam të ndërtojmë jo vetëm për 20 vitet e ardhshme, por ndoshta për 100 vitet e ardhshme e ku secili ka diçka për të bërë: Kush është i ri do të shkojë tek “Sunny Hill”; Kush është me fëmijë do të shkojë tek këndi i lodrave; Kush është i moshuar do luajë një domino dhe kush ka dalë për të pirë një kafe me familjen e vet të ketë mundësi ta ketë këtë shërbim. Të njëjtën gjë duam të bëjmë në Farkë,” deklaroi Kryetari i Bashkisë së Tiranës.
Bashkia e Tiranës do të marrë praktikat me të mira të projekteve të realizuara në Parkun e Liqenit Artificial dhe do t’i realizojë edhe në Parkun e Farkës.
“Duke qenë se Amfiteatri ka funksionuar në mënyrë fantastike tek Liqeni Artificial, do ta realizojmë edhe në Farkë. Do të ketë dhe këtu korsi biçikletash dhe një hapësirë fantastike për ata që duan të vrapojnë apo të merren me sport”, sqaroi Veliaj.
Në projektin ri janë parashikuar dhe disa ndërhyrje që e bëjnë edhe më atraktiv parkun e Farkës, si pedanolja, këndi i lojërave, aktiviteteve për fëmijët e grupmoshave nga 1 deri në 14 vjeç, si dhe zonë pikniku në të gjithë ambientin rrethues, zona e amfiteatrit, molet, platformat lundruese, zona e peshkimit etj,.
