Carlo Ancelotti, trajneri i Real Madrid, iu përgjigj deklaratave të homologut të tij të Barcelonës, i cili theksoi se Champions League nuk fitohet gjithmonë nga më i forti.
“Gjithmonë kam preferuar të fitoj Champions League. Kampionati është shumë i rëndësishëm, por Champions është kompeticioni më i rëndësishëm. Janë të ndryshme: kampionati ka 38 ndeshje, ndërsa Championsi shumë më pak. Detajet e vogla kanë shumë rëndësi në Evropë, por nuk ka të bëjë fati. Kur flet për fat, je duke fshehur problemet e skuadrës tënde dhe meritat e kundërshtarit. Mua më ka ndodhur që të më kenë shënuar 3 gola në 6 minuta në Champions, por edhe që kam shënuar dy gola në një minutë. Këto detajet e vogla kontrollohen me një mentalitet shumë të fortë, por me mentalitet grupi dhe jo individual”, tha Ancelotti.
Xavi Hernandez, trajneri i Barcelonës, u shpreh kështu në prag të sfidës ndaj Interit: “Më duket se Leo Messi tha që Championsin nuk e fiton gjithmonë më i miri dhe mendoj se ka të drejtë. Kampionati është më i drejtë”.
Edhe Dani Carvajal kishte një përgjigje ironike për deklaratat e trajnerit të Barcelonës: “Kemi fituar 5 nga 9 Champions të fundit, duket qartë se kush është më i forti. Gjithmonë hapet debati kur fiton Reali sepse kur fitojnë të tjerët, ka qenë me meritokraci”.
