Ish-kryeministri Sali Berisha ka folur mbrëmjen e sotme për hapësirën e re të komunikimit me qytetarët, atë përmes rrjetit social Tik-Tok.
Pyetur nëse është frymëzuar nga ish-kryeministri italian Silvio Berlusconi, Berisha deklaroi në “Opinion” se ka qenë ide e tija hyrja në këtë platformë.
Ai shtoi në emisionin “Opinion”, se e sheh si një formë për të qenë i lidhur me të rinjtë e sotëm ndonëse pjesa më e madhe e tyre nuk janë votues.
“Tik-Tok është sot më i preferuar në mediat sociale i moshës afro adoleshencës. Pavarësisht nga interesi i tyre për politikën komunikimi me ta është i rëndësishëm. Nuk synoj komunikim politik por si një pjesë e rëndësishme e rinisë shqiptare. Ka qenë ide e imja e shtyrë në realizim për shkaqe të ndryshme. Unë komunikoj vetëm në ‘Facebook’.
Nuk jam njeri i lidhur me fotografinë. Fotografia për mua përfaqëson të shkuarën gjithnjë. Asnjëherë nuk kam pasur pasion për instagramin. Është relative. Tik-Tok ka një dinamizëm sot. Ka video. Pasioni për teknologjinë është një pasion që më ka shoqëruar në dekada dhe e ndjek me ambicie dhe me interes të veçantë. Është hapur para dy orësh që ka patur mbi 8500″, u shpreh Berisha.
