Si gjithmonë në rast festash shqiptarët që kërkojnë të kalojnë kufirin me Greqinë u duhet të presin në radhë shumë më tepër se sa në ditët e zakonshme. Edhe në këtë prag Krishtlindjesh, pika kufitare e Kakavijës ka pasuar një fluks turistësh që kërkojnë të kalojnë festën në Greqinë fqinjë.
Pritet që gjatë gjithë këtyre ditëve, deri për festën e Vitit të Ri, numri i udhëtarëve të rritet në mënyrë të ndjeshme.
Udhëtarë konfirmojnë për Fjala.al, se kanë më shumë se katër (4) orë që presin në radhë dhe ende nuk kanë mundur ta kalojnë pikën doganore. Pala shqiptare punon ngadalë dhe jo sipas parametrave që duhen për të tilla raste.
Ndërkohë që pengesa të mëdha janë hasur edhe në kontrollin e bagazheve. Përveç vonesave punonjësit e doganës i bëjnë kontrollet pa dorezat përkatëse.
Udhëtarët shprehen të irrituar për këto vonesa të pakuptimta dhe bëjnë me faj papërgjegjshmërinë dhe indiferencën e punonjësve shqiptarë të doganës, që edhe pse kanë informacionin e duhur për radhën kilometrike të makinave dhe autobusëve, sërish veprojnë me ngathtësi.
Ndërkohë, duhen marrë masa që situata e kthimit pas festave të jetë e stabilizuar, pasi përvoja ka treguar se edhe në këto raste shqiptarët nuk u shmangen dot radhëve të gjata dhe vonesave deri në disa orë, në kalimin e doganës./ Fjala.al/
