Pak ditë më parë kryeministri Edi Rama zhvilloi një vizitë zyrtare në Mbretërinë e Bashkuar, ku takoi kryeministrin britanik, Rishi Sunak.
Disa detaje mbi këtë takim ka zbuluar mbrëmjen e sotme ambasadori Alastair King-Smith, i cili tha se dy kryeministrat kanë marrë një vendim për shqiptarët e burgosur në Angli.
Alastair King-Smith deklaroi në një intervistë me Erla Mëhillin se do të deportohen në vendlindje një kategori të burgosurish shqiptarë.
“Të dy kryeministrat ranë dakord që të sigurohen kushtet e duhura të burgjeve. Të dy kryeministrat ranë parimisht dakord për të kryer transferimin sa më të shpejtë të mundshëm të atyre që janë klasifikuar sipas ligjit për të lëvizur nga burgjet britanike në ato shqiptare. Sigurisht, kjo do jetë më mirë edhe për ta për të qenë sa më afër familjeve të tyre.
Gjithashtu kjo vlen edhe për ata të cilët presin lirimin me kusht, t’u jepet mundësia të kthehen në Shqipëri. Këtu flasim vetëm për shtetas shqiptarë dhe sipas parametrave të përgjithshëm të marrëveshjes nuk kemi identifikuar asnjë shtetësi tjetër përveç asaj shqiptare për momentin”, theksoi ambasadori britanik.
