Vera i përket dasmave, ndaj ja ku jemi, gati të të japim disa sugjerime që përkojnë me veshjet me të cilat nuk duhet të paraqitesh në dasëm.
E para dhe më e rëndësishmja, mos u vish me të bardha!
Ose edhe me ngjyra të përafërta me të bardhën. Vëmendjen e meriton nusja dhe nuk ka pse të jeni të dyja me fustan të bardhë.
Mos u vish shumë thjesht
Merre pak më seriozisht eventin. Jo domosdoshmërisht e kemi fjalën për xixa, shkëlqim dhe temina, por mos vish gjënë e parë që sheh në dollap. Qëndro larg veshjeve të zyrës dhe nëse nuk bën dot kompromis me rehatinë, investo në një palë taka dhe në një fustan komod.
Mos vish pantallona që i vesh çdo ditë
Të gjithë kemi një palë pantallona pa të cilat s’bëjmë dot, ama, besojmë se në dasmë mund t’i zëvendësojmë me një veshje më moderne dhe in. Si për shembull kostumet alla Kate Middleton, apo jumpsuit.
Përshtatu me vendin
Për shembull: Nëse çifti ka zgjedhur të martohet në kishë, ndoshta duhet të konsiderosh mbulimin e supeve dhe dekoltenë. Një shall elegant, apo një fustan që ka një prerje interesante do të të zgjidhë shumë punë.
Mos e merr më seriozisht se duhet
Siç thamë, vëmendjen e meriton nusja, ndaj nëse po mendon të dukesh *ekstra*, të guxosh me fustane shumë ekstravagante, xixa, printe, apo gjithçka tjetër që bërtet “Dua vëmendje”, ndoshta duhet të ndryshosh mendim.
Zgjidh me kujdes këpucët
Nëse sapo dëgjon “Valle kosovare”, apo “Vallen e Tropojës” nuk të mban dot vendi, atëherë duhet ta dish më mirë se ne se sa të rëndësishme janë takat e duhura. Përzgjidhi me kujdes, në mënyrë që të jesh sa më rehat dhe ta tundësh vendin duke kërcyer.
