Kryeministri grek Kyriakos Mitsotakis deklaron se beteja aktuale me zjarret që kanë pushtuar prej ditësh disa rajone të vendit është e vështirë.
Në prezantimin e tij në mbledhjen e kabinetit sot, kreu i qeverisë greke tha se operacionet e zjarrfikësve dhe emergjencave civile për të shuar flakët dhe për të evakuuar banorët në vende të sigurta, vijon.
Ndërsa shtoi se deri më tani nuk është raportuar asnjë humbje jete. Sipas tij situata paraqitet e vështirë, teksa temperaturat janë në rritje dhe kjo favorizon vatrat e zjarrit të krijuara në ishullin Rodos dhe jo vetëm, shkruan Protothema.gr.
“Ne kemi ende një verë të vështirë përpara. Siç thashë në Parlament, tani mund të kemi më shumë mjete, më shumë fuqi punëtore dhe përgatitje më të mirë, por e dimë se beteja është e vështirë.
Gjërat do të përkeqësohen me temperatura më të larta, erëra të forta, thatësirë. Në këtë përballje është e rëndësishme që nuk kemi pasur humbje njerëzore. Operacionet e largimit rezultuan të suksesshme sidomos në Rodos ku largimi i qytetarëve u organizua me siguri të madhe .
Edhe një herë, dua të them një falënderim të madh për të gjitha forcat e tyre të vijës së parë, por veçanërisht për vullnetarët që gjithashtu treguan vetëflijim mbresëlënës në Rodos.
Nesër dhe e enjte do të jenë ditë të vështira, shpresoj që pas kësaj kushtet të ndihmojnë më shumë. Kjo është arsyeja pse ne të gjithë qëndrojmë në gatishmëri absolute”, shtoi Mitsotakis.
Ai gjithashtu vuri në dukje se për Mesdheun, i cili është një pikë e nxehtë e ndryshimeve klimatike, nuk ka mbrojtje magjike kundër zjarreve, ndërsa shtoi se nëse do të kishte, do ta kishin zbatuar.
