Për prindërit nordikë, të lënurit e fëmijëve të flenë jashtë – edhe gjatë dimrit – është krejtësisht normale. Një sërë studimesh kanë treguar përfitime të shumta të lënies së të vegjëlve tuaj nën qiellin blu (ose gri) – por për njerëzit në pjesë të tjera të botës, vetë ideja tingëllon pak e çmendur, por edhe interesante.
Në Finlandë, Suedi, Danimarkë, Islandë, vendet nordike në përgjithësi, është krejtësisht normale që prindërit ta vendosin fëmijën e tyre të flejë në një karrocë jashtë shtëpisë, apartamentit apo edhe kafenesë. Ndërsa foshnja është në gjumë, prindërit janë të lirë të shijojnë një kafe me miqtë, të rregullojnë rrobat, të dërgojnë ato emaile ose çfarëdo që duhet bërë brenda. Dhe çerdhet e bëjnë këtë gjithashtu. Në të gjitha vendet nordike, nëse bebet nuk janë në rrugë, janë në oborrin e shtëpisë. Dhe nëse nuk ka rrugë të përshtatshme për karrocat e fëmijëve dhe as oborr në shtëpi, ata janë në ballkon në “karrocën e ballkonit”.
Kjo normë kulturore e nordikëve ka qenë me të vërtetë një temë debati për shkak të dallimeve në të gjithë botën. Për shembull, në vitin 1997, një nënë daneze e quajtur Anette Sørensen u arrestua në New York pasi e la fëmijën e saj të flinte jashtë një restoranti. Sipas ‘New York Post’, ajo u akuzua për rrezikim të jetës së fëmijës dhe kaloi 36 orë në burg.
Pavarësisht debateve, mendohet se gjumi jashtë ka një efekt qetësues, është i mirë për sistemin imunitar, redukton kollën dhe ftohjen, përmirëson kohëzgjatjen dhe cilësinë e gjumit dhe mjekët e rekomandojnë atë si një mënyrë për të ulur ekspozimin e fëmijëve ndaj mikrobeve dhe për të ulur rrezikun e infeksion gjithashtu.
E lidhur me këtë është pushimi i fëmijës nga mikrobet që mund të ngecin lehtësisht në ambiente të mbyllura gjatë ditëve më të ftohta të dimrit, ku njerëzit priren t’i mbajnë dritaret të mbyllura. Në një studim finlandez të vitit 2008 nga Qendra Kombëtare për Informacionin e Bioteknologjisë, prindërit nga vendet nordike raportuan se foshnjat bëjnë dremitje më të gjata dhe më të thella kur flenë jashtë – të mbuluara, natyrisht – në “të ftohtë”.
Për më tepër, ata mendonin se praktika ishte e shëndetshme për shkak të ajrit dhe tingujve të ndryshëm të natyrës./E.Ç
