Opozita nuk e votoi rezolutën anti-korrupsion të paraqitur nga qeveria, por la një “derë të hapur” për të mbajtur një qëndrim të qartë në të ardhmen. Dyshimet janë nëse rezuluta anti-korrupsion prek ose jo institucionet e drejtësisë së re, veçanërisht SPAK. Socialistët janë të vendosur ta çojnë përpara nismën, duke theksuar se nuk do preken institucionet e drejtësisë, madje do jenë në “ndihmë të tyre”, por kjo situatë mbetet për tu parë.
Rezoluta e miratuar ditën e enjte në Parlament duket se do të prekë edhe ndërhyrje të tjera në sisitemin e drejtësisë. Në emër të reformave, ata do të bëjnë edhe ndryshime të tjera të cilat i shkojnë përshtat rregullimit të sistemit. Socialsitët mendojnë se rezoluta nuk e prek SPAK, por në atë çfarë parashtrojnë duket se do të ketë ndërhyrje dhe një “kontroll pozitiv” mbi këtë institucion. Deputeti i PS Toni Gogu mori në mbrojtje shefin e tij përballë akuzave se me këtë mekanizëm, Edi Rama kërkon të godasë SPAK, ndërsa nuk e mohon që mazhoranca do të bëjë një tjetër ndërhyrje kirurgjikale në sistemin e drejtësisë. “Në këtë moment lind nevoja që të thellojmë reformën në drejtësi. Kjo nisëm është për ta bërë ta pakthyeshëm me atë që nisem me sistemin e drejtësisë, vettingun dhe SPAK. Për shkak të mungesave të sistem, për shkak të reformës së thellë janë krijuar mangësi të burimeve njerëzore dhe stoku është shtuar. Nuk është me të rënë të çekiçit që mundet të zgjidhet por kërkon ndërhyrjen nga të gjitha institucionet.”, tha ai. Gogu e pohon që drejtësia e re ka shqetësuar jo pak edhe PS-në, por kjo, sipas tij nuk do ta nxisë forcën qeverisëse drejt hakmarrjes. “Jeni duke i thënë një të sëmuri, i cili ka bërë kimion e parë, apo ka bërë operacionin e parë dhe tani po shkon të bëjë operacionin e dytë ju po i thoni: po bëni gabim se ti je i pabesueshëm. E dini fare mirë se sa na dhemb ne dhe PS ai proces drejtësie, por jemi këtu me gojë mbyllur dhe gojëkyçur. Nuk ka fitore apo dhe lavdi pa vuajtur. Nuk vjen e diela pa të premten kur ti vdes dhe kryqëzohesh dhe ja del mbanë.”, tha ai. Për çdo ndryshim ligjor apo kushtetues, mazhoranca do të ketë nevojën për votat e opozitës. Por edhe nëse PD do të vendosë që të mos marrë pjesë, PS është e gatshme që të mos ndalet për ta çuar përpara këtë mision të Edi Ramës që lidhet me integrimin. “Ftesa jonë është e pakthyeshme për ta. Nuk besoj që opozita do të humbë një shans të tillë. Ne kemi e treguar që dimë të bëjmë opozitën e vetvetes. PS të monitorojë qeverinë e Edi Ramës? PS do të vazhdojë të çojë përpara axhendën europiane.”, tha ai. Si në rast pranimi apo refuzimi të opozitës, mazhoranca është në një situatë të favorshme, që të përdorë “dëshirën” për të luftuar korrupsionin edhe si një manovër elektorale. “Ti thuash shqiptarëve, dëgjo ne kemi nevojë të ndryshojmë zakonet institucionale në çdo institucion, po janë karta elektorale, sepse ti i prezanton me një alternativë qeverisëse.”, nënvizoi ai. Krahas objektivave politike, edhe SPAK ka shprehur dëshirat e veta, njëra prej të cilave është mundësia e rikandidimit të prokurorëve specialë për një mandat të dytë. Duke qenë edhe pjesë e grupit të punës prej dy vitesh së bashku me Gazment Bardhin, Gogu është njohur me këtë kërkesë që kërkon ndryshim kushtetues. Socialistët duken që kanë lënë një derë të hapur për Altin Dumanin. “Kemi qenë të hapur për çdo ndryshim ligjor po pa prekur Kushtetutën, ama nëse organet ligjzbatuese dhe partnerët tanë strategjik të cilët punojnë ngushtë me ta por edhe me ne biem dakord. Pra ne duam të dëgjojmë ekspertët çfarë të thonë ekspertët.”, tha ai. Opozita nuk ka shprehur në asnjë rast se është kundër këtij komisioni, ndërsa ka artikuluar se së pari duhet parë objekti dhe qëllimi i tij, ndërsa nuk kanë munguar edhe akuzat që përmes ndryshimeve ligjore kërkohet të sulmohet SPAK. Sipas tekstit të rezolutës synimi është që Kuvendi të rrisë rolin e tij mbikëqyrës dhe llogarikërkues ndaj qeverisë, institucioneve të pavarura dhe agjencive ekzekutive ligjzbatuese.
