Fundjavën e kaluar u morën masat më të ashpra të izolimit në Shqipëri, duke u ndaluar njerëzve daljen nga shtëpia që të premten pasdite dhe deri të hënën në mëngjes. Kryeministri Edi Rama deklaroi se heqja e masave kufizuese do të bëhej në mënyrë graduale dhe duke patur në konsideratë numrin e rasteve të reja.
Por pavarësisht izolimit të madh në fundjavë, kjo javë shënoi numrin më të lartë të infektimeve të reja. E ndërkohë që fundjava ka mbërritur sërish, Qeveria nuk ka bërë me dije se cilat do të jenë masat.
Qytetarët janë ende të paqartë nëse mbeten në fuqi masat kufizuese të fundjavës së kaluar, ku lëvizja u ndërpre të premten në orën 17.30, deri në orën 05.30 të së hënës. Apo nëse Qeveria ka marrë vendim që lëvizja të lejohet edhe të shtunën paradite, ose nëse do të ketë lehtësim edhe gjatë të dielës.
Shqipëria ka mbyllur javën e gjashtë të izolimit, ndërkohë që kurba e infeksioneve të reja nuk po shënon rënie.
