Piktori i njohur është gati të hapë ekspozitën e re me portrete të familjarëve, e cila do të mbajë titullin “Fisnikët”
Nga Leonard Veizi
Talenti i tij rrjedh si ujëvarë. Dhe në Firencen italiane, është më i njohur se në “Broduein” e Tiranës. Megjithëse përkohësisht ndodhet në kryeqendrën italiane të kulturës, pjesë e Veriut ku koronavirusi ka shtrirë krahët gjerësisht, Arben Morina thotë se vazhdon të pikturojë, aspak i shqetësuar prej armikut të padukshëm e mikroskopik. Disa vite më parë ai pasqyroi me një sukses të paparë 40 burrat e pavarësisë shqiptare, në një ekspozitë e cila u hap në hollin e godinës së Kryeministrisë. Edhe më herët Morina me penelin e tij kishte shëtitur në oborret e fisnikëve, duke u dhënë princeshave evropiane shëmbëlltyrat e tyre në kanavacë. Ndërsa sot Arben Morina ka vendosur t’i kushtohet vetes dhe njerëzve të tij, në një seri portretesh familjare që do të rrëfejnë për rrugën dhe bëmat e fisnikëve të vjetër të trungut të tij. Për “Fjala”, piktori i njohur thotë për njëfarë kohe, ashtu si dhe të tjerët ka qëndruar brenda në shtëpi, duke u përpjekur në maksimum të zbatojë rregullat dhe këshillat e specialistëve. Por kjo nuk e ka penguar të vazhdojë punën. “Situata që po kalojmë nuk mendoj se frymëzon shumë. Pse e them këtë? Secili nga ne dhe të gjithë së bashku po “luftojmë” me një armik të padukshëm e të panjohur, me një virus vdekjeprurës. Kjo situatë krijon një gjendje stresi dhe nuk lë shumë vend për frymëzime artistike. Pavarësisht nga kjo, unë po pikturoj për një projektin tim të hershëm, portretet e familjarëve, të paraardhësve të mi, që nga stërgjyshat nga ana e nënës e babait e deri te brezat më të rinj. Gjithë kjo punë do të finalizohet me hapjen e një ekspozite personale vetëm me portrete dhe figurën humane, të cilën do ta titulloj “Fisnikët”, thotë piktori i njohur. Në situata të vështira ai si artist thotë se me artin e tij kërkon t’u japë njerëzve kënaqësi shpirtërore, duke prekur kordat e tyre të ndjeshmërisë. E sipas Morinës, kjo është edhe filozofia e jetës së tij./Gazeta Fjala/
