Një helikopter që transportonte pelegrinë hindu është rrëzuar në Indi, duke marrë jetën e shtatë personave që ndodheshin në bord.
Aksidenti ndodhi pak minuta pasi helikopteri u nis, në një fluturim që duhej të zgjaste vetëm rreth 10 minuta. Helikopteri po udhëtonte nga qyteti i tempullit Kedarnath në shtetin verior të Uttarakhand drejt Guptkashi, një vend i njohur pelegrinazhi në Himalaje.
Ngjarja tragjike ndodh vetëm tre ditë pas rrëzimit të një avioni të Air India-s në afërsi të aeroportit të Ahmedabadit në Indi veriperëndimore, ku humbën jetën të paktën 270 persona.
Helikopteri, i operuar nga kompania private Aryan Aviation, u rrëzua në një zonë me pyje disa kilometra larg rrugës së pelegrinazhit të Kedarnathit, rreth orës 5:30 të mëngjesit sipas kohës lokale.
Zyrtarët thanë se aksidenti dyshohet të ketë ndodhur për shkak të kushteve të këqija atmosferike. Autoritetet kanë nisur një operacion kërkimi dhe shpëtimi dhe pritet të rishikojnë protokollet e operimit për fluturimet në këtë rajon të vështirë./e.t
