Anëtari i Këshillit Bashkiak të Tiranës, Fabian Topollaj, ka kundërshtuar gjatë mbledhjes së Këshillit procedurën për shkarkimin e Erion Veliajt si kryebashkiak.
Topollaj tha gjatë mbledhjes se votimi për shkarkimin e Veliaj duhet të ishte i fshehtë, pasi sipas tij, çdo vendim për individ të caktuar, bëhet i fshehtë.
“Kryetare, për procedurë. Aktet individuale, siç është edhe ky akt individual, duhet të bëhen me votim të fshehtë normalisht. Ne nënkryetarët e Bashkisë, nënkryetarët e Këshillit i kemi zgjedhur me votim të fshehtë. Çdo vendim për një individ bëhet me votim të fshehtë, aq më tepër për emërimin dhe shkarkimin e organeve”, tha mes të tjerash Topollaj.
Ai tha gjithashtu se shkarkimi i Veliajt i shërben luftës së brendshme në PS dhe vetë kryeministrit Edi Rama.
Topollaj shtoi se Rama po bën me duart e Këshillit Bashkiak, diçka që duhet ta bënte vetë si kryetar i Këshillit të Ministrave. Kjo pasi sipas Topollajt, shkarkimi i kryebashkiakëve bëhet vetëm me vendim të Këshillit të Ministrave. m.p.
