Na është zhduk ngjyra rozë që gjoja na karakterizon e na ka ngel vetëm e zeza. Na i keni nxi e po vazhdoni të na i nxini. Fustanet na i blini rozë, dhe dhomën na i lyeni me rozë, po jetën e veten po na i sterroni. Boll pra, boll.
Na nxini më shumë kur…
Viktimën e fajësoni – “Do këtë bërë diçka ajo, se kot nuk i shkuan asaj. Sa vajza të tjera kishte aty. Po vet e ka fajin që ngatërrohet me këta njerëz.” Boll me pyetjet çfarë bëri viktima, e filloni shikoni pse ka kaq shumë viktima. Pse ato nuk kanë guxim të flasin, dhe pse kur flasin nuk dëgjohen. Viktima s’mund të jetë fajtore, as bashkëfajtore, as shkaktare e fajit të dhunuesit. Asnjëherë.
Na nxini më shumë kur…
Viktima bëhet kryefjala – “Ajo kreu marrëdhënie seksuale me forcë me dhunuesin”. Seriozisht e keni????? Njohuri elementare e gjuhës shqipe kryefjala tregon kush e bën veprimin, kundrinori tregon atë mbi të cilin bie veprimi, pra atë që e pëson. Aq kaq një gjë nuk dimë akoma? Apo bëhet me këst për ta zbehur pak krimin e për të na nxirë më shumë duke….
Viktimizuar fajtorin, dhunuesin, përdhunuesin, vrasësin -“Po hajt mo ai burrë është; po hajt se burri për një nder jeton; po mashkulli mashkull mbetet, fajin e kanë femrat që i prishin mendjen. “E teksa gjeni çdo arsye për të justifikuar pse ai arriti deri aty, se normalisht do kishte një arsye shumë madhore, viktimave të mos vritet, përdhoset, e gjymtohet më shumë.
Na nxini kur nuk na dëgjoni, kur nuk na besoni edhe kur na dëgjoni, na nxini kur e zvogëloni hallin tonë dhe e merrni me të qeshur, na nxini kur s’pushoni së llapuri për ne por nuk na përgjigjeni kur kërkojmë ndihmë, na nxini kur në vend të na përqafoni na ktheni krahët, na thoni ‘shhht se është turp; mos ta marrin vesh dynjaja, duro, hë se s’është dhe aq keq, apo kur shkoni dhe me larg “ na nxive faqen”
Juve ju nxihet faqja, e ne na nxihet shpirti. Jemi të nxira për sa kohë juve veç pillni meshkuj që 15 vjeç duan të dhunojnë, të abuzojnë, të urrejnë femrën, duan të zotërojnë e të përdhosin, të gjymtojnë e të vrasin. Na nxini kur i jepni jetë atyre që veç do marrin jetën e tjetrit e për këtë arsye do ndihen thjesht me shumë ‘burra’.
Na nxini se jeni dështakë. Jeni prindër dështakë që s’dini të bëni njerëz. Nuk pret njeri të bëni shkencëtarë, s’ka pas ndonjëherë Shqipëria e s’do ketë ndonjëherë. Po të bëni të paktën njerëz. Po as këtë s’e bëni dot.
Prindër dështakë, që s’dinë të bëjnë njerëz.
Jeni të dështuar si shkollë, jeni të dështuar si polici, jeni të dështuar si media, jeni të dështuar si shërbim social, ehhh si shtet po e po, i vetmi institucion që lulëzon është ‘dhuna’ aty po që kemi sukses.
E me dështimin tuaj po na nxini ne;
e aty ku ka zi ka vdekje;
e aty ku ka vdekje s’ka më shpresë.
