Krahas Ardjan Çapjas, i cili ka marrë një plumb në shpatull, i plagosur nga ngjarja e rëndë e ndodhur paraditen e sotme në Elbasan ka mbetur edhe një zjarrfikës.
Pas atentatit ndaj Ardjan Çapjas, autorët u larguan nga vendi i ngjarjes me një makinë me targa të vjedhura, ndërsa e kanë djegur atë disa kilometra më tej për të humbur gjurmët.
Ndërkohë, zjarrfikësit janë njoftuar nga banorë të zonës për një zjarr që kishte rënë aty.
Duke mos qenë të njoftuar për çfarë kishte ndodhur, ata janë afruar për të shuar flakët, por shpërthimi i fishekëve në bagazhin e makinës ka plagosur lehtë në këmbë njërin prej tyre.
Në njoftimin r saj zyrtar policia sqaroi se, në lagjen “Skënderbej”, Elbasan, rreth orës 09:43, është gjetur duke u djegur një mjet tip “Volkswagen”.
Për shuarjen e zjarrit kanë shkuar forcat zjarrfikëse dhe gjatë punës për shuarjen e zjarrit është plagosur në këmbë, jashtë rrezikut për jetën, punonjësi i zjarrfikëses shtetasi D. M, 38 vjeç.
Dyshohet së plagosja është shkaktuar si pasojë e plasjes së plumbave që mund të kenë qenë në bagazhin e automjetit. Për fat të mirë ai është jashtë rrezikut për jetën dhe nën kujdesin e mjekëve./b.b/fjala.al
