“Blerta Josifi, e vetmja e mbijetuar në familjen Josifi do të përballet sërish me Prokurorinë”, deklaroi sonte gazetarja Anila Hoxha.
E ftuar në studion e emisionit “Open”, Hoxha tha se Blerta nuk tregon detaje në lidhje me sektin që i ka orientuar drejt kësaj ngjarjeje që u kthye në horror.
Ndërkohë, gazetarja shtoi se Blerta tregon se si u angazhuan në Kishën Ungjillore, në Dëshmitarët e Jehovait, por stepet dhe shmanget kur bëhet fjalë për të treguar emrin e sektit që i përkushtoheshin.
“Vajza do të përballet sërish me Prokrurorinë, Blerta nuk tregon disa të dhëna për të cilat dyshihet se ajo….Blerta është shmangur dhe nuk ka treguar se në cilin sekt bënin pjesë dhe se kur kanë marrë pjesë vitet e fundit. Ajo është shmangur për të thënë emrin. Tregon se si u angazhuan në kishë, se si u ftuan nga tezja për t’u larguar, por fsheh emrin e sektit. Blerta thotë që ‘ishim të angazhuara për të shkuar në rrugën e Zotit’,”- tha Hoxha ndër të tjera.
Ngjarja e rëndë u zbulua mbrëmjen e 2 korrikut dhe tronditi opinionin publik. Në pallatin parafabrikat mbrapa ish-Mapos rruga “Hamdi Cenoimeri”, dy trupat e vdekur të dy grave kanë “bashkëjetuan” për muaj me me banorët e lagjes.
Zhaneta Josifi, 56 vjeçe dhe Anisa Josifi 30 vjeçe, u gjetën të vdekura në banesë, ndërsa në gjendje të rëndë ishte edhe vajza tjetër e Zhanetës, Blerta Josifi 34-vjeçe. Kjo e fundit bashkë me nënën e saj kishin mbajtur në banesë trupin e pajetë të Anisës, të cilin e lyenin me vaj e uthur që të mos binte erë.
Në banesën e tyre të thjeshtë në këtë lagje të Tiranës, policia gjeti shënime fetare, ku u mësua se nëna dhe dy vajzat kanë qenë praktikante të sektit të njohur si “Dëshmitarët e Jehovait”. Blerta që prej 2 korrikut, ndodhet e shtruar në spitalin Psikiatrik të Tiranës.
la.mi/Fjala.al
