Arjan Ndoja do të dalë para Komisionit të Vettingut. 23 apartamente, dy lokale, dy makina e qindra metra katror tokë do jenë sfida e madhe e tij për pastërtinë e figurës
I shpëtoi një prite të frikshme, ndërkohë që mori plagë të rënda. Prokurori Arjan Ndoja, që prej vitesh është objekt i disa akuzave publike, kohëve të fundit mori vëmendjen e gjithë opinionit publik jo vetëm për një sulm me armë, sulm në të cilin humbi djalin që e kishte të punësuar si shofer, po ishte objekt edhe i sulmeve politike. Edhe pse ndaj tij rëndojnë një sërë akuzash që kanë të bëjnë me persona të tretë, Arjan Ndoja tashmë ka një tjetër përballje të fortë. Për të mundur të kalojë atë pragun e famshëm të vettigut, Arjan Ndoja duhet të justifikojë të gjithë pasuritë e tij që janë jo të vogla. Sipas të dhënave emri i Ndojës është në listën e personave që janë përgjedhur nga Komisioni i Pavarur i Kualifikimit (KPK) për t`iu nënshtruar pastërtisë së figurës. Sipas burimeve zyrtare saktësohet se sipas vendimit të Komisionit të Vetingut, prokurorit të Durrësit, Arjan Ndoja do t`i verifikohet ligjshmëria e pasurisë, pastërtia e figurës dhe aftësia profesionale. Për rrjedhojë, ai duhet të justifikojë me të ardhura të ligjshme jo pak po 23 apartamente të deklaruara në vitin 2008 dhe në vitin 2016. Gjithashtu duhet të justifikojë edhe blerjen e dy makinave, që sipas të dhënave të ‘Open Data’ janë me vlerë 34 mijë euro dhe 20 mijë euro. Po ashtu, prokurori duhet të justifikojë para Komisionit të Vetingut edhe dy lokale me vlerë 114 600 euro dhe 159 520 euro, ku prokurori është pronar me 100 %, në kushtet kur ku ka nisur karrierën në drejtësi rezulton pa asnjë pasuri të paluajtshme. Objekt verifikimi do të jetë gjithashtu edhe një lëvizje e madhe në pasurisë e bashkëshortes. Bashkëshortja E. Ndoja, e cila ka përfaqësuar si avokate një shtetas për të marrë 45 mijë metra katror tokë shtetërore në Gjirin e Lalzit me vendim të kryegjyqtares së dorëhequr të Durrësit Joana Qeleshi, i kanë dhuruar në 2013-n, 6 prona në Durrës me sipërfaqe 196 211 metra katrorë.
Por në lidhje me verifikimin e pastërtisë së figurës së tij tashmë është shtuar edhe një tjetër elementë mjaft i vështirë për t`i krijuar mundësi mbrojtjeje avokatit. Lidhja me eksponentin kriminal, një nga emrat proverbial të botës së krimit të kohëve të fundit, e ka futur emrin e prokurorit në një debat të hapur jo vetëm politik. Kështu padyshim lidhje me 40-vjeçarin Aleksandër Laho, i njohur ndryshe edhe si Landi Muharremi, apo si ‘Rrumi’, do të jetë në fokusin e Vetingut përsa i takon pastërtisë së figurës së prokurorit. Aleksandër Laho ishte në makinë me prokurorin Ndoja në momentin e asaj prite fatale, ndërkohë që më vonë u mësua se në fakt ata jo vetëm që udhëtonin bashkë por edhe kishin drekuar bashkë. Po ashtu “Rrumi” ishte edhe klienti i bashkëshortes së tij në një çështje për marrjen e një cope toke po në Gjirin e Lalzit, vendit që është kthyer në një ‘minë të telekomanduar’ dhe që gjendet në duar personash të inkriminuar dhe me mbështetje të forta politike. Landi Muharremi sipas policisë dhe prokurorisë, po sigurisht jo zyrytarisht është dyshuar si personi i vetëm që urdhëroi dhe mori pjesë në rrahjen e amerikano- libanezit Fadi Mitri, për çështjen e konfliktit të 45 mijë metra katror tokë shtetërore në Gjirin e Lalzit. Por Rrumi asnjëherë nuk u mor nën hetim nga prokuroria për këtë çështje dhe aq më pak për një tjetër çështje sensitive, atë të humbjes së dosjeve në prokurorinë e Durrësit, ku sërish dyshimet bien mbi të dhë miqtë e tij.
