Banka e Shqipërisë ka miratuar paketën për të parandaluar pastrimin e parave dhe financimin e terrorizmit.
“Paketa përfshin ndryshime në rregulloren “Për parandalimin e pastrimit të parave dhe financimit të terrorizmit”, rregulloren “Për mbikëqyrjen e konsoliduar” dhe rregulloren “Për mbikëqyrjen e transaksioneve bankare në rrugë elektronike”. Ndryshimet e këtyre rregulloreve synojnë sigurimin e konsistencës me dispozitat e reja dhe të ndryshuara të ligjit 9917/2008 “Për parandalimin e pastrimit të parave dhe financimit të terrorizmit”, si dhe plotësimin e paketës së ndryshimeve rregullative në kuadër të angazhimeve të Bankës së Shqipërisë, për zbatimin e rekomandimeve të Komitetit të Ekspertëve të Moneyval, gjatë Raundit V të vlerësimit për Shqipërinë”, thuhet në vendimin e Bankës së Shqipërisë.
Banka e Shqipërisë në mbledhjen e saj vendosi gjithashtu mbajtjen të pandryshuar të normës bazë të interesit në nivelin 1.0%, si dhe të normave të interesit të depozitës njëditore dhe të kredisë njëditore në Bankën e Shqipërisë, përkatësisht në nivelet 0.1% dhe 1.9%.
