Drejtuesi qendror i zyrës Operacionale për Menaxhimin e Fatkeqësisë Natyrore, ministri Bledar Çuçi, gjatë një vizite me banorët e prekur nga tërmeti në Manëz, u garantoi qytetarëve bonusin e qirasë deri në maj 2021.
“Qeveria do të garantojë bonusin e qirasë për familjet e prekura nga tërmeti deri në muajin maj 2021” u shprehë Çuçi gjatë një vizite në Manëz të Durrësit. Bashkë me deputetin Fidel Ylli, ministri vizitoi banorët e prekur nga tërmeti në këtë zonë. Mbi 100 banorë që mbetën pa shtëpi janë strehuar nëpër kabina me të gjitha kushtet e nevojshme të jetesës.
“Këtu çdo gjë është në rregull për sa i përket kanalizimeve, ngrohjes dhe ndriçimit. I vetmi problem deri më tani është një ambient i përbashkët për kuzhinë dhe lavanteri. Biseduam me administratorin dhe do të marrim një ambient këtu pranë me qira, për t’i dhënë zgjidhje përfundimtare kësaj çështje. Të gjithë banorët e prekur nga tërmeti i kemi sistemuar në kabina. Kjo është faza më e rëndësishme në kushtet e kësaj fatkeqësie natyrore. Për vlerësimin përfundimtar të godinave të dëmtuara do të vijë një tjetër grup i posaçëm”, tha ministri Çuçi.
Gjatë ndalesës në Manzë ministri pa nga afër edhe disa prej banesave të dëmtuara nga tërmeti i datës 26 nëntor. Ndërkohë grupet e përbashkëta të inxhinierëve vijojnë punën në terren për vlerësimin e dëmeve të fatkeqësisë natyrore. Në përfundim të këtij procesi do të përgatitet raporti përfundimtar, që i hap rrugë mbajtjes së konferencës së donatorëve dhe më pas programit të rindërtimit./ Fjala.al/
