Orëve të para të ditës së sotme Vlora është tronditur nga një shpërthim i telekomanduar. Një mjet është hedhur në erë diku rreth orës 02.50 minuta në afërsi të një ambjenti banimi.
Policia që ka shkuar në vendin e ngjarjes ka bërë me dije se nuk ka dëme në njerëz por pas hetimeve të para dyshimet flasin se mjeti i përket një prokurori. Nuk dihen rrethanat dhe as shkaqet e këtij sulmi pasi i zoti i mjetit ka refuzuar të ketë probleme me asnjë person.
Ngjarja ka ndodhur në lagjen 28 Nëntori dhe të dhënat flasin se shpërthimi është kryer nga distanca dhe që ka prishur tërësisht mjetin. Burimet e policisë bëjnë me dije se janë marrë dëshmitë e para dhe se janë sekuestruar një sërë kamerash.
Po ashtu është fiksuar itinerari i mjetit në gjithë ditën e djeshme për të fiksuar ndonjë detaj që lidhet me ndonjë person të dyshimtë.
Policia mban ende sekret emrin e të zotit të mjetit ndërkohë pritet që pas pak të jepet edhe një deklaratë zyrtare për ngjarjen e rëndë. Në fakt Vlora thuajse çdo ditë zgjohet me një shpërthim, por fatmirësisht nuk ka patur të lënduar.
Autorët me akte të tilla duket se çojnë mesazhe tek të zotët e mjeteve ose te ndonjë familjar i tyre.
Në thuajse asnjë rast policia dhe as ata vetë nuk arrijnë dot të shkojnë as tek autorët dhe as tek shkaqet reale për të hetuar sulme të tilla.
Prokurorët kanë marrë në duar hetimet për këtë rast. /Fjala.al/
