Menjëherë pas daljes në një konferencë të përbashkët për shtyp të liderëve të Rajonit ku u vu nën sulm mosprania e Kosovës ka reaguar kryeministri i dorëhequr i Kosovës.
Kreu i qeverisë në ikje, Ramush Haradinaj, ka thënë se Kosova duhet të fokusohet në zbatimin e MSA-së dhe se nuk ka nevojë për Mini-Shgenen.
“Jemi të interesuar për Shengen, pra për Bashkimin Evropian, Brukselin. Kosova është vend euroatlantik. Kjo është perspektiva jonë”, ka thënë Haradinaj.
Sipas tij plani për krijimin e Minishengenit është për të hequr taksën që Kosova i ka vendosur produkteve me origjinë nga Serbia e Bosnje e Hercegovina.
“Krejt Minishengeni një qëllim e ka, me e heq taksën”, ka thënë sot Haradinaj.
Teksa ka folur për deklarimet e Edi Ramës, Haradinaj ka thënë se atë e ka vëlla, por që nuk ka pasur qare pa dalë kundër ndarjes së Kosovës.
Haradinaj më tej tha se me mënyrën si po vazhdon të sillet Serbia, duke i mohuar edhe krimet e luftës, Kosova do të injorojë çfarëdo organizimi dhe iu thotë të gjithëve: “Puna e mbarë pa ne”.
Gjithashtu Haradinaj ka folur edhe për zhvillimet politike në vend duke vënë theksin në faktin se Lëvizja Vetëvendosja duhet të krijojë institucionet e reja. /Fjala.al/
