Duro Mustafai, një gazetar veteran që vazhdoi të punonte deri kohët e fundit, është ndarë nga jeta.
Lajmin e bën me dije, Z. Clirim Hoxha i cili në faqen e tij në facebook ka shkruar: Një gazetar, një redaktor, një kryeredaktor boton numrin e fundit të gazetës “HORA” në moshën 86 vjeçare dhe largohet drejtë qiellit për të shndritur tani mes yjesh.
Duro Mustafai ka lindur në qytetin e Vlorës, më 21 shkurt 1933. Durua, mësimet e para i kreu në shkollën 7 vjeçare “Naim Frashëri” në vendlindje. Përfundoi me rezultate të shkëlqyera shkollën e mesme “Luigj Gurakuqi” në Elbasan. Mbaroi më tej dy fakultete.
Studimet e larta i kreu në Fakultetin e Historisë dhe Filologjisë, dega Gjuhë – Letërsi, Tiranë. Fillimisht ka punuar si drejtor shkolle dhe mësues i letërsisë në Vlorë. Krijimtarinë letrare e ka nisur që në bankat e shkollës.
Për më shumë se 30 vjet është marrë me gazetari. Ka punuar redaktor në gazetën “Zëri i Popullit”, kryeredaktor i gazetës “Drita” (6 vjet). Disa vite, para se të dilte në pension ka qenë kryeredaktor i gazetës “Shqipëria” (për diasporën), në Ministrinë e Punëve të Jashtme. Për disa vjet ka dhënë mësim si pedagog i jashtëm, në degën e Gazetarisë të Universitetit të Tiranës. Duro Mustafai është autor i disa librave.
