Nga Enver Bytyçi
Sot është 30 vjetori i krijimit të Lidhjes Demokratike të Kosovës, partisë së parë opozitare-antikomuniste në Ballkan e ish-Jugosllavi.
Themelimi i kësaj partie ndodhi vetëm 50 ditë mbas shembjes së Murit të Berlinit. Ishte bashkimi më i madh i shqiptarëve në historinë e Kosovës rreth elitës intelektuale të saj dhe liderit të madh e të pakontestuar, Dr. Ibrahim Rugova.
Krijimi i Lidhjes Demokratike të Kosovës është interpretuar në forma të ndryshme. Por askush dhe asgjë nuk e ndryshon faktin se ajo erdhi në skenën politike të ish-Jugosllavisë si alternativë e re në zhvillimet e ardhshme të federatës e të Kosovës.
Ndaj për pak javë ajo u bë partia më e madhe politike në ish-Jugosllavi, me 700 mijë anëtarë.
Në këtë kuptim LDK u themelua si një lëvizje e fuqishme me platformë dhe alternativë të vetme aleancën me SHBA-të dhe Evropën, demokracinë dhe vlerat perëndimore, refuzimin e okupimit dhe sundimit serb në Kosovë, si dhe lirinë e pavarësinë e saj.
Ishte një akt që i parapriu të gjitha ngjarjeve dhe fenomeneve që do ta shoqëronin shpërbërjen e asaj federate artificiale.
Në këtë kuptim shqiptarët dhe elita akademike e intelektuale e Kosovës, për herë të parë kapën trenin e euro-atlantik dhe dëshmuan se dinë ta mbrojnë interesin kombëtar të shqiptarëve.
Krijimit Lidhjes Demokratike të Kosovës është ngjarje nyje për Kosovën post jugosllave, deri në ditët e sotme.
Lidhja Demokratike u udhëhoq nga prijësi i shqiptarëve, Ibrahim Rugova dhe akademikë të shquar si Fehmi Agani, Fatmir Sejdiu e dhjetëra të tjerë.
Fuqia e saj qëndroi te lidhja dhe besimi I madh te qytetarët e Kosovës, te vizioni i saj për të ardhmen dhe lirinë e vendit.
Prandaj edhe sot Lidhja Demokratike qëndron si alternativë e besimit dhe kurajës në Kosovë. Ajo është në përpjekje për të bashkëqeverisur me Vetëvendosjen.
Nëse do t’i përmbahet filozofisë dhe vizionit rugovist, LDK do ta ndryshojë faqen e Kosovës, do t’i japë vendit ndryshimin e madh, të cilin e votuan qytetarët më 6 tetor./Fjala.al/
