Drejtori sportiv i skuadrës së Lazios, shqiptari Igli Tare ka folur për suksesin e klubit të tij pas fitores së Superkupës së Italisë në finalen me ekipin e Juventus mbrëmjen e djeshme.
Në një komunikim me mediet Tare është shprehur se fitorja është e të gjithëve,pasi është arritur nga të gjithë bashkë.
“E ndërtuam të gjithë bashkë, prandaj është fitorja e një grupi të madh. Shpresoj të jetë vetëm fillimi i një rrugëtimi të gjatë. Me kalimin e kohës ndikojnë shumë gjëra, por kur je i bindur se ke bërë një punë të mirë ke besim te rezultatet. Ky trofe është shumë i rëndësishëm, është konfirmimi i një skuadre të mrekullueshme”.-tha ai.
Shqiptari ka përgëzuar trajnerin e lojtarët, por edhe nuk ka harruar të thumbojë ata persona që sipas tij kujtohen për ekipin vetëm në fitore, ndërsa në momente të vështira zhduken.
“Merita është e trajnerit Inzaghi dhe e stafit të tij. Ata e dinë si t’i sistemojnë gjërat si në momentet negative dhe në ato pozitive. Është një trofe që dua t’ua dedikoj edhe atyre kërpudhave që dalin pas shiut. Kjo fitore është edhe për ata, që të mos të dalin vetëm kur fitojmë por edhe kur humbim, sepse skuadra ka nevojë për njerëzit e saj sidomos në këto momente”-deklaroi Igli Tare./Përgatiti: Fjala.al/
